Pages

Monday, October 18, 2010

တစ်နှစ်ပြည့် ဒိုင်ယာရီ

အလုပ်တွေရှုပ်နေတာနဲ့ပဲ ဘလော့ဘက်ကို အချိန်မပေးနိုင်တာ အတော်ကို ကြာနေပါပြီ။ ပြီးခဲ့တဲ့တစ်ပတ်တုန်းကမှ ဘာရယ်မဟုတ်ဘူး ဘလော့လေးကို ဖွင့်ကြည့်ရင်း ဘလော့စရေးတဲ့နေ့စွဲကို အမှတ်တမဲ့ ကြည့်လိုက်မိတော့ “ဟာ....ငါဘလော့ရေးတာ တစ်နှစ်တောင်ပြည့်ခါနီးပါပေါ့လား...” ဆိုပြီး အံ့သြသွားတယ်။ စိတ်ထဲမှာ ကိုယ့်ကိုကိုယ် သိပ်မကြာသေးဘူးလို့ပဲ ထင်နေတာကိုး။ ထင်ဆို စာကလည်း အားတက်သရော များများစားစားမှ မရေးဖြစ်တာလေ။

အဲဒါနဲ့ ဒီတစ်နှစ်အတွင်း ငါဘာတွေများရေးခဲ့မိပါလိမ့်ဆိုပြီး ပြန်ကြည့်လိုက်တော့ အပုဒ်ငါးဆယ်နီးပါး ရေးခဲ့ရာမှာ ကိုယ့်ဟာနဲ့ကိုယ် စိတ်တိုင်းကျတာဆိုလို့ လက်ချိုးရေလိုက်တော့ တစ်ဖက်တောင် မပြည့်ချင်ဘူး။ ပိုစ့်တော်တော်များများကို ပြန်ဖတ်ကြည့်လိုက်တဲ့အခါ တစ်ချို့အကြောင်းအရာတွေဆိုရင် အခုဖတ်ကြည့်တဲ့ အချိန်မှာ ဒီနေရာမှာ ငါဘာလို့များ အဲဒီလိုရေးခဲ့တာပါလိမ့်၊ တကယ်ဆို ဒီလိုလေးရေးသင့်တာ၊ ဟိုနေရာလေးမှာဆိုရင်လည်း ငါအဲဒီလိုမရေးခဲ့မိရင် အကောင်းသား စတဲ့စိတ်မျိုးတွေ ဖြစ်လာမိတယ်။

ဒါပေမယ့် ကိုယ့်ကိုကိုယ် ပြန်မေးလိုက်ပါတယ်။ ငါဘာလို့ ဒီဘလော့လေးကို ရေးတာလဲ လို့လေ။ ရလာတဲ့ အဖြေကတော့ ရှင်းပါတယ်။ အဓိကကတော့ စာရေးတာဝါသနာပါလို့၊ နောက်တစ်ခုက ကျွန်မဖြတ်သန်းခဲ့တဲ့ ဘ၀တစ်လျှောက်မှာ ကျွန်မမြင်တွေ့ကြားသိခဲ့ရတဲ့၊ မြင်တွေ့ကြားသိနေရတဲ့ အတွေ့အကြုံ၊ အဖြစ်အပျက်တွေ၊ ကျွန်မတွေးမိတာ ခံစားမိတာလေးတွေကို ဒိုင်ယာရီလေးတစ်ခုပေါ်မှာ သွန်ချ ရေးမှတ်ထားမိသလိုမျိုး မှတ်တမ်းသဘောမျိုးလေး ရေးထားချင်တာကြောင့်မို့လို့ပါပဲ။

အဲဒီအထဲမှာမှ ကျွန်မရဲ့စာလေးတွေကို ဖတ်မိတဲ့သူတွေရှိခဲ့ရင် ကျွန်မရဲ့ အတွေ့အကြုံတွေကို သူတို့ကို မျှဝေလိုက်သလိုဖြစ်မယ်။ ခံစားချက်၊ အတွေးအခေါ်တွေနဲ့ ပတ်သက်လို့ကတော့ လူအမျိုးမျိုးမှာ ခံယူချက်အဖုံဖုံ ရှိကြမှာပါပဲ။ ကိုယ်ဒီလိုခံယူတိုင်း၊ တွေးတိုင်း သူများက ဒီလိုခံစားမိချင်မှ ခံစားမိမယ်၊ တွေးချင်မှ တွေးမိမယ်။ ကိုယ့်စာဖတ်တိုင်း ကိုယ်နဲ့အယူအဆတူရမယ်လို့တော့ စိတ်မထားမိဘူး။ ကွဲလွဲတဲ့အမြင်၊ ခံစားချက်တွေရှိခဲ့ရင်၊ ကိုယ်မသိနိုင်တဲ့ ရှုထောင့်တွေရှိခဲ့ရင်လည်း သူတို့တွေက ထောက်ပြခြင်းအားဖြင့် ကိုယ်သိလာနိုင်မယ်၊ ကိုယ်လက်ခံနိုင်တာမျိုးဆိုရင် လက်ခံမယ်၊ လက်မခံနိုင်တာမျိုးဆိုရင်လည်း အကျိုးသင့်အကြောင်းသင့် ပြန်လည်ဆွေးနွေးလို့ရတယ် စသည်ဖြင့်ပေါ့လေ။ အဲဒီလိုတွေတွေးလိုက်တော့မှ အရေးအသားကို စိတ်တိုင်းကျတာ မကျတာဆိုတဲ့ခံစားချက်က သက်သာသွားပါတယ်။

ဘ၀တစ်လျှောက်မှာ ဒိုင်ယာရီစာအုပ်လေးတွေ ရေးမှတ်သိမ်းဆည်းထားတဲ့အခါ ကိုယ်သတိရတိုင်း အချိန်မရွေး ပြန်လည်ထုတ်ယူဖတ်ရှုနိုင်သလို အခုလိုဘလော့လေးပေါ်မှာ မှတ်တမ်းတင်ထားတော့လည်း ကိုယ်ကြည့်ချင်တဲ့အချိန်တိုင်း အချိန်မရွေး ပြန်ဖွင့်ကြည့်လို့ရတယ်လေ။ ဘလော့သက်တမ်း တစ်နှစ်အတွင်းမှာ စိတ်အနှောက်အယှက် ဖြစ်စရာလေးတွေတော့ ကြုံခဲ့ရပါသေးတယ်။ အဆိုးဆုံးကတော့ ဘလော့သက်တမ်း သုံးလေးလ မရှိတရှိလေးမှာပဲ အကြောင်းမဲ့သက်သက် စီဘောက်စ်နဲ့အပြည့် ရစရာမရှိအောင်ကို လာရောက်ဆဲဆိုသွားတာပါပဲ။ အဲဒီတုန်းကများဆိုရင် ရှက်လည်းရှက်၊ အရမ်းလည်းစိတ်မကောင်းဖြစ်မိခဲ့သလို အရမ်းလည်း အံ့သြမိခဲ့တယ်။

ကျွန်မအနေနဲ့ ဘလော့စရေးပြီဆိုကတည်းက ကိုယ့်ဟာနဲ့ကိုယ် အေးအေးဆေးဆေးပဲ နေခဲ့တယ်။ ကိုယ့်စိတ်ထဲမှာ ချရေးချင်မိတာလေးတွေကို ချရေးတယ်။ ရေးတဲ့အထဲမှာလည်း ဘယ်သူ့ကိုမှ တိုက်ခိုက် ပုတ်ခတ်စော်ကားခြင်း မရှိခဲ့သလို ဘယ်သူနဲ့မှလည်း ရန်ငြိုးရန်စ မရှိခဲ့ပါဘူး။ ဒါကို သူတို့အနေနဲ့ ဘာ့ကြောင့်အဲဒီလိုလုပ်ရတာလည်းဆိုတာ နားကိုမလည်နိုင်အောင်ပါပဲ။ စိတ်မကောင်းဖြစ်သွားမိတာလည်း အမှန်ပါပဲ။ အဲဒီလိုနဲ့ စီဘောက်စ်ကိုလည်း ပိတ်ပစ်လိုက်တာ အဲဒီအချိ်န်ကတည်းက ပြောပါတော့။ စီဘောက်စ်မရှိတော့တဲ့ အခါကျတော့ ဘလော့ဂါမောင်နှမတွေ၊ သူငယ်ချင်းတွေနဲ့ အလှမ်းဝေးသွားသလို ခံစားရပေမယ့် လောကကြီးမှာ အဲဒီလိုလူမျိုးတွေ ရှိနေတတ်တော့ကာ ဘယ်လိုမှ ပြန်တပ်ချင်စိတ်လည်း မရှိတော့ပါဘူး။

တစ်ခါတစ်လေ အလုပ်တွေအရမ်းများလို့ ဘလော့ကို ဘယ်လိုမှ လှည့်မကြည့်နိုင်တော့တဲ့အခါ ပိတ်ပစ်လိုက်ရင် ကောင်းမလားဆိုတာမျိုးကို ထပ်ခါထပ်ခါ တွေးမိတယ်။ ဒါပေမယ့်လည်း မနေနိုင်ပါဘူး။ အခြေအနေလေး ပေးတာနဲ့ ဒီဘလော့လေးပေါ်ကို ရောက်လာမိပြန်တာပါပဲ။ မွန်းကြပ်တဲ့ နေ့စဉ်လူနေမှုဘ၀တွေထဲမှာ ဒီဘလော့လေးဟာ ကျွန်မအတွက်တော့ စိတ်ရဲ့ထွက်ပေါက်လေး တစ်ခုပါပဲ။

တစ်ခါတုန်းက ဘလော့ကို သုံးပတ်လောက် ပိတ်လိုက်ဖူးပါသေးတယ်။ ဒါပေမယ့် ကြာလာတော့ လူက ဘယ်လိုဖြစ်လာသလဲဆိုရင် တစ်ခုခုလိုအပ်လာသလိုမျိုး ခံစားလာရတယ်။ မောင်နှမတွေနဲ့လည်း အဝေးကြီးဝေးသွားသလိုမျိုး၊ ကိုယ်က ဘလော့စည်းဝိုင်းရဲ့အပြင်ဘက်ကို ရောက်သွားသလိုမျိုးတွေ ခံစားလိုက်ရတယ်။ ဒါနဲ့မဖြစ်သေးပါဘူးဆိုပြီး ပြန်ဖွင့်လိုက်တော့မှပဲ စိတ်က ပုံမှန်ပြန်နေလို့ရသွားပါတယ်။

အဲဒီလိုနဲ့ ပိတ်မယ်ကြံရွယ်လိုက်၊ အခြေအနေပေးတာနဲ့ မနေနိုင်မထိုင်နိုင် ပိုစ့်လေးတစ်ပုဒ် ချရေးမိလိုက်နဲ့ပဲ ဒရွတ်ဆွဲပြီးတော့တော့ ချီတက်နေမိဦးမယ် ထင်ပါတယ်။ တကယ်လည်း ကိုယ့်ဘလော့ကိုကိုယ် သူများတွေလို အားနဲ့မာန်နဲ့ သွက်သွက်လက်လက် ချီတက်နေတဲ့ဘလော့လို့မမြင်မိဘဲ ဒရွတ်ဆွဲဘလော့လို့သာ မြင်မိပါတယ်။ ဘာပဲပြောပြော ကျွန်မရဲ့ဘလော့လေး စတင်ဖြစ်တည်ခဲ့တဲ့ အချိန်ကနေ အခုတစ်နှစ်ပြည့်တဲ့ အချိန်အထိတိုင်အောင် ကျွန်မကို အားပေးဖေးမခဲ့ကြတဲ့ သူငယ်ချင်းမောင်နှမတွေ အားလုံးကို ကျေးဇူးအများကြီးတင်ပါတယ်။

တစ်နှစ်ပြည့်တဲ့ အထိမ်းအမှတ်အနေနဲ့ ဘလော့လေးအတွက် ဘာမှတော့လည်း ကျွန်မအနေနဲ့ ထူးထူးခြားခြား မပြင်ဆင်ခဲ့မိပါဘူး။ အဲဒီတော့ကာ တစ်နှစ်ပြည့်ဘလော့လေးအတွက် တစ်ယောက်တည်းသောသူဆီက လက်ဆောင်ရထားတဲ့ တစ်ပုဒ်တည်းသော ကဗျာလေးကိုပဲ အမှတ်တရအနေနဲ့ တင်လိုက်ပါတယ်။ ကဗျာလေးကို လက်ဆောင်ပေးတဲ့သူကိုလည်း ကျေးဇူးအများကြီးတင်ပါတယ်လို့။

~~~~~~~~~~~~~~~~~~~~~~~~~~~~~~

“ဒိုင်ယာရီဖွဲ့တေး”

အောက်တိုဘာ ဆယ့်ရှစ်

ရင်ခွင်တံခါးကို ဆွဲအဖွင့်
လေပြေ အဝင့်မှာ
Inspiration မြားအစင်းစင်းတို့
အိပ်မက်ရာသီ အလီလီကျင်းပ
ကလောင်အခင်းအကျင်းတွေအောက်
ချဉ်းနင်းဝင်ရာက်လို့
တစ်နှစ်မြောက်ခဲ့ပြီကွယ်။ ။

ဟိုအရှေ့ဆီမှာ
ကာလယန္တရား ရွေ့လျား
အဖြူရောင်ရင်ခွင်ကြားမှာ
စုတ်ချက်ထင်စေမယ့် ယုံကြည်မှုတွေက
ခဝါမချ တိမ်တမန်အလှနဲ့
ရစ်ဖွဲ့တန်ဆာဆင်
အနာဂတ်လွင်ပြင်ထိ
အလင်းတို့နဲ့အတိပြီးစေ။ ။

Thursday, September 16, 2010

အခါလွန်မိုး

ကျောခိုင်းခဲ့ကြပြီးပြီပဲကွယ်
ဘာရယ်ကြောင့်များ လှည့်ကြည့်နေရဦးမလဲ
အဆုံးအစမဲ့ မာနတွေကြောင့်
နောက်ဆုံးမှာ
သုံးမရတဲ့ နောင်တတွေသာ
အဖတ်တင်လာခဲ့ပါပေါ့။ ။

ဒါပေမယ့်လည်း
ဦးဦးဖျားဖျားသံယောဇဉ်တွေနဲ့
ထူးထူးခြားခြားနှောင်တွယ်ခဲ့မိလို့
သည်းခြေထိစိုက်ခဲ့ရတဲ့ဆူး
ရူးချင်လည်းရူးပါစေတော့
ဘယ်တော့မှ ကိုယ်မနှုတ်ဘူး။ ။

ရာသီတွေ ရွေ့လျား
အိပ်မက်တွေ မှုန်ဝါးခဲ့ပေမယ့်
တို့နှစ်ယောက်ရဲ့
မှတ်တမ်းတွေ ဟောင်းမသွားခဲ့ဘူး
ဇာတ်လမ်းတွေ ပြောင်းမသွားခဲ့ဘူး
နှောင်းသွားခဲ့တာက အချိန်။ ။

တို့နှစ်ယောက်
ကိုယ့်လမ်းကို ကိုယ်လျှောက်
ခရီးတွေအတော်ရောက်ခဲ့ကြပြီပဲ
ရှေ့ဆက်ဖို့မဖြစ်နိုင်တော့တဲ့ဘ၀
အိပ်မက်ကနေ နိုးထလိုက်ကြရအောင်။ ။

မုန်းလို့ဝေးခဲ့ရတာမဟုတ်ပေမယ့်
အဆုံးလို့ပဲ သတ်မှတ်လိုက်ကြမယ်
အခါလွန်မှရွာတဲ့မိုးက
အငြိုးနဲ့သည်းရင်တောင်မှ
ပျိုးပင်တွေ ရှင်လာနိုင်မှာမဟုတ်တော့ဘူးလေ။ ။

Thursday, September 2, 2010

မျက်နှာဖုံးကို ကြည့်ရုံမျှဖြင့်


ကိုရီးယားဆောက်လုပ်ရေးကုမ္ပဏီတစ်ခုမှာရှိတဲ့ ပရောဂျက်တွေအတွက် လုပ်ငန်းအစီအစဉ်များ ရေးဆွဲထိန်းချုပ်ရတဲ့ဌာနမှာ အလုပ်လုပ်ကိုင်နေရသူ ကျွန်မအတွက် လုပ်ငန်းသဘောသဘာဝအရ အဓိကအနေနဲ့ ဆက်စပ်လုပ်ကိုင်နေရသူတွေထဲမှာ ဆိုဒ်ထဲက အင်ဂျင်နီယာတွေ၊ မန်နေဂျာတွေသာမက၊ ရုံးပေါ်က မန်နေဂျာတွေလည်း ပါပါတယ်။

အဲဒီလိုလုပ်ကိုင်ရတဲ့အခါမှာ ကျွန်မအနေနဲ့က ပရောဂျက်တွေ အများအပြားရှိတဲ့အလျောက် သက်ဆိုင်ရာ ပရောဂျက်အသီးသီး၊ ဆိုဒ်အသီးသီးနဲ့ ပတ်သက်တဲ့ အချက်အလက်တွေကို ပုံစံအမျိုးမျိုးနဲ့ ကွန်ပြူတာထဲမှာ အစီအစဉ်တကျ သိမ်းဆည်းရပါတယ်။ မန်နေဂျာတစ်ဦးနဲ့တစ်ဦး လုပ်ငန်းနဲ့ပတ်သက်လို့ အီးမေးလ်တွေပို့ကြတဲ့အခါမှာလည်း အလုပ်တွေက ကျွန်မနဲ့ပါဆက်စပ်နေရတာဆိုတော့ ကျွန်မဆီကိုပါ အီးမေးလ်တွေကို ဖြန့်လေ့ရှိကြပါတယ်။

တစ်ရက်မှာတော့....ပရောဂျက်အသစ်တစ်ခုမှာ အလုပ်လုပ်နေတဲ့ ကိုရီးယားမန်နေဂျာတစ်ယောက်က ရုံးပေါ်မှာရှိတဲ့ အိန္ဒိယလူမျိုး စင်ကာပူနိုင်ငံသားမန်နေဂျာဆီကို လုပ်ငန်းအချက်အလက်တွေနဲ့ပတ်သက်တဲ့ အီးမေးလ်တစ်စောင် လှမ်းပို့ပါတယ်။ ရုံးပေါ်ကမန်နေဂျာက အိန္ဒိယလူမျိုးဖြစ်ပေမယ့် စင်ကာပူနိုင်ငံမှာမွေးဖွားကြီးပြင်းလာတဲ့အတွက်ကြောင့် အင်္ဂလိပ်စာ အင်္ဂလိပ်စကားအပြောအဆိုတွေနဲ့ပတ်သက်ရင် အထူးကျွမ်းကျင်ပိုင်နိုင်မှုရှိကာ စင်ကာပူနိုင်ငံသားအများစုရဲ့ထုံးစံအတိုင်း သူ့ကိုယ်သူစိတ်ကြီးဝင်နေသူတစ်ဦးဖြစ်ပြီး အလုပ်အတူတူတွဲလုပ်နေရတဲ့ ကိုရီးယားလူမျိုးတွေအပေါ်မှာလည်း တစ်စက်မှအထင်မကြီးတတ်သူတစ်ဦးလည်းဖြစ်ပါတယ်။ အခုလည်း ဆိုဒ်က ကိုရီးယားမန်နေဂျာရဲ့ အဲဒီအီးမေးလ်ကို လက်ခံရရှိပြီးတဲ့အခါမှာ ရုံးပေါ်ကမန်နေဂျာက ဆိုဒ်က မန်နေဂျာပြုလုပ်ထားတဲ့ လုပ်ငန်းအချက်အလက် ပုံစံအနေအထားတွေကို သဘောမကျတဲ့ပုံစံနဲ့ “ဘာတွေကိုတော့ဖြင့် ဘယ်လိုလုပ်လိုက်ပါ”၊ “ဘာတွေကိုတော့ဖြင့် ဘယ်ပုံစံပြင်လိုက်ပါ” စသည့်အပြင် ကျွန်မကိုလည်း “ဆိုဒ်ကမန်နေဂျာအနေနဲ့ နမူနာပုံစံယူနိုင်ရန်အတွက် အရင်ပရောဂျက်အဟောင်းက (ကျွန်မအသုံးပြုခဲ့တဲ့) စာရွက်စာတမ်းပုံစံတွေကို ဆိုဒ်ကမန်နေဂျာဆီကို ပို့ပေးလိုက်ပါ” စသည့် ညွှန်ကြားချက်များဖြင့် ထိုအီးမေးလ်ကို ပြန်လိုက်ပါတယ်။

အဲဒီမှာတင်ပဲ ဆိုဒ်ထဲက မန်နေဂျာက တော်တော်လေး ပေါက်ကွဲသွားပါတယ်။ တကယ်တော့ အရင်သုံးနေကျ ပုံစံဟောင်းတွေနဲ့ မတူပေမယ့်လည်း သူလုပ်ထားတဲ့ပုံစံတွေကလည်း သုံးဖို့အဆင်ပြေပါတယ်။ ဒါကို ဟုိုတစ်ယောက်က

မန်နေဂျာချင်းအတူတူ သူ့ကို “ဒီလိုလုပ်လိုက်ပါ” “ဟိုလိုလုပ်လိုက်ပါ” ဆိုတဲ့ပုံစံတွေနဲ့ ပြောလာတော့ တော်တော်ခံပြင်းသွားပုံရတဲ့အပြင် သူလိုမန်နေဂျာတစ်ယောက်ပြင်ဆင်ထားတဲ့ပုံစံတွေကို သူတို့ရဲ့လက်အောက်မှာ လုပ်ကိုင်နေရတဲ့ ကျွန်မလိုလက်ထောက်တစ်ယောက်က ပြင်ဆင်ထားတဲ့ ပုံစံတွေနဲ့ပြောင်းပြီး သုံးခိုင်းတယ်ဆိုတော့ သူ့ရဲ့ဂုဏ်သိက္ခာကိုပါ ထိပါးသလိုဖြစ်သွားတယ်လို့ထင်ပါတယ်။

အဲဒါနဲ့ပဲ သူ့ဆီကနေ အီးမေးလ်တစ်စောင် ချက်ချင်းပြန်လာပါတယ်။ အဲဒီပြန်လာတဲ့အီးမေးလ်ထဲမှာ သူက သူ့အနေနဲ့ မန်နေဂျာတစ်ယောက်ဖြစ်တဲ့အပြင် သူ့ရဲ့လုပ်သက်အရ၊ oversea အတွေ့အကြုံတွေအရ သူဟာ ဘယ်လိုအလုပ်မျိုးကိုမဆို သူများရဲ့အကူအညီမပါပဲနဲ့ ကျွမ်းကျင်ပိုင်နိုင်စွာလုပ်နိုင်ပါတယ် ဆိုတဲ့အကြောင်းတွေကိုထည့်ရေးလိုက်ပါတယ်။ အီးမေးလ်တစ်ခုလုံးကို ခြုံငုံပြောရမယ်ဆိုရင်တော့ ရုံးပေါ်ကမန်နေဂျာအနေနဲ့ သူ့ရဲ့အရည်အချင်းကို အထင်မသေးပါနဲ့၊ လျှော့မတွက်ပါနဲ့လို့ပြောချင်တာပါ။

သူ့ရဲ့အီးမေးလ်က အရှည်ကြီးဖြစ်ပေမယ့် အောက်ဆုံးကနေ အဆုံးသတ်အနေနဲ့ရေးလိုက်တဲ့ စာကြောင်းလေးတစ်ကြောင်းကိုတော့ ကျွန်မအနေနဲ့ အရမ်းကိုသဘောကျသွားမိတဲ့အပြင် စိတ်ထဲမှာလည်း စွဲသွားပါတယ်။ အဲဒီစာကြောင်းလေးကတော့
"Don’t judge a book by its cover." တဲ့လေ.....။

သူတို့နှစ်ယောက်ကတော့ ဆက်လက်ပြီး အီးမေးလ်နဲ့ ဘတစ်ပြန်၊ ကျားတစ်ပြန် အပြန်အလှန် ရန်ဖြစ်နေကြပေမယ့် ကျွန်မကတော့ အဲဒီစာတမ်းလေးကိုပဲ သဘောတကျနဲ့ အတွေးတွေပွားနေမိတော့တာ။

ဟုတ်တယ်....ကျွန်မတို့ ဖြတ်သန်းလာခဲ့တဲ့ ဘ၀တစ်လျှောက်မှာ လူပေါင်းမြောက်မြားစွာနဲ့ ကြုံတွေ့ဆက်ဆံခဲ့ရတယ်။ အဲဒီလူတွေကို စာအုပ်တွေနေရာမှာ ထားပြီး ကျွန်မခံစားတွေးတောကြည့်မိတယ်။ ကျွန်မတို့တွေ စာအုပ်ဆိုင်မှာစာအုပ်ဝယ်တာပဲ ဖြစ်ဖြစ်၊ စာအုပ်ငှားတာပဲ ဖြစ်ဖြစ်(ကိုယ့်အနေနဲ့ လုံးဝမသိသေးတဲ့ စာအုပ်ဆိုရင်) ပထမဆုံးကတော့ စာအုပ်မျက်နှာဖုံးကို အရင်ဆုံးကြည့်မိတာတော့ အမှန်ပါပဲ။ ဘာပဲဖြစ်ဖြစ် စာအုပ်မျက်နှာဖုံးလေးက လှလှပပ သေသေသပ်သပ် စ်ိတ်ဝင်စားစရာပုံစံလေးဆိုရင်တော့ အထဲကစာကိုပါ ဖတ်ကြည့်ချင်စိတ်က အလိုအလျောက်ပေါ်ပေါက်လာတာပါပဲ။ ဒီလိုမှ မဟုတ်ဘဲ မျက်နှာဖုံးက လှတပတမဟုတ်ဘဲနဲ့ ကြောက်စရာ၊ လန့်စရာမျက်နှာဖုံးမျိုး ဒါမှမဟုတ် စိတ်ဝင်စားစရာတစ်စက်မှမကောင်းတဲ့ မျက်နှာဖုံးမျိုးဆိုရင်တော့ အထဲကစာကို ဖတ်ကြည့်ဖို့နေပါဦး စာအုပ်ကို ကိုင်ကြည့်ဖို့ အဆင့်လောက်တောင်မှ ရောက်ချင်မှ ရောက်မှာပါ။

ဟုတ်ပြီ.... ဒါဆိုရင် စာအုပ်မျက်နှာဖုံးက စိတ်ဝင်စားစရာမကောင်းလို့ဆိုပြီး မဖတ်ကြည့်ခဲ့တဲ့၊ ကိုင်တောင်မကြည့်ခဲ့မိတဲ့ စာအုပ်တွေရဲ့ အတွင်းပိုင်းမှာပါတဲ့စာသားတွေဟာ အလွန်အင်မတန်မှ တန်ဖိုးရှိတဲ့ စာကောင်းပေမွန်တွေ၊ အလွန်အင်မတန်မှ လက်ရာပြောင်မြောက်လှတဲ့၊ အနုပညာမြောက်လှတဲ့ ဖန်တီးမှုအရေးအသားတွေ ဖြစ်မနေနိုင်ဘူးလား။ မျက်နှာဖုံးလေး လှရုံနဲ့ စိတ်ဝင်စားသွားပြီး ၀ယ်ယူလိုက်မိတဲ့ စာအုပ်တွေကရော အတွင်းထဲမှာ သူ့ရဲ့မျက်နှာဖုံးနဲ့ လိုက်ဖက်ညီစွာ တကယ်ပဲ တန်ဖိုးရှိတဲ့စာတွေ ဖြစ်နေပါရဲ့လား။ ကိုယ်က စာအုပ်မျက်နှာဖုံးကို အထင်ကြီးပြီး ဈေးကြီးကြီးပေးဝယ်ခဲ့တယ်။ ဒါပေမယ့် ကိုယ့်လက်ထဲရောက်လာလို့ တကယ်ဖတ်ရှုကြည့်လိုက်တဲ့အခါမှာတော့ ကိုယ်ထင်ထားတာနဲ့ တခြားစီဖြစ်နေတာမျိုး၊ ကိုယ်ပေးလိုက်ရတဲ့ တန်ဖိုးနဲ့ မတန်လောက်အောင်ကို ညံ့ဖျင်းတဲ့စာမျိုးတွေ ဖြစ်ကောင်းဖြစ်မနေနိုင်ဘူးလား။ ဒါဆိုရင် ကျွန်မတို့ မ၀ယ်ဖြစ်ခဲ့တဲ့၊ မြည်းတောင် မကြည့်ဖြစ်ခဲ့တဲ့ဲ့ စာအုပ်တွေထဲက အဖိုးတန်တဲ့အရာတွေကိုရော ကျွန်မတို့ ဘယ်လောက်တောင် ဆုံးရှုံးခဲ့ပြီးပြီလဲ။

ဒါပေမယ့်လည်း.... လောကကြီးမှာရှိတဲ့ ဒီလောက်များပြားလှစွာသော စာအုပ်တွေကို ကျွန်မတို့အနေနဲ့ တစ်အုပ်ချင်းစီကို အသေးစိတ် နှိုက်နှိုက်ချွတ်ချွတ် သေချာလိုက်လံဖတ်ရှုဖို့ဆိုတာကရော ဖြစ်နိုင်ပါ့မလား။ များသောအားဖြင့်တော့ ကိုယ်နဲ့လက်လှမ်းမှီရာမှာရှိတဲ့၊ ကိုယ့်အနေနဲ့အဆင်ပြေမယ်ထင်တဲ့ စာအုပ်တွေကို ဖတ်ရှုလိုက်ရတာပဲမို့လား။

ဟုတ်ပြီ....ဒါဆိုရင် ကျွန်မတို့ကိုယ်တိုင်သာ စာအုပ်တစ်အုပ်ဖြစ်ခဲ့မယ် ဆိုရင်ရော။ သူတစ်ပါးအမြင်တင့်တယ်ဖို့၊ စိတ်ဝင်စားစရာကောင်းဖို့ စာအုပ်ရဲ့မျက်နှာဖုံးကိုပဲ လှသည်ထက်လှအောင် ပြင်နေကြမှာလား....။ အတွင်းထဲက တကယ့်စာသားတွေကို တန်ဖိုးရှိအောင်လုပ်မှာလား။ ကိုယ့်ကို ဖတ်ရှုမိတဲ့သူ၊ ၀ယ်ယူမိတဲ့သူအတွက် ဘာတွေကိုယ့်ဘက်က ပြန်ပေးနိုင်အောင် ကြိုးစားမလဲ....။ သူကမြတ်မြတ်နိုးနိုးနဲ့ ကိုယ့်ကိုတန်ဖိုးထား ၀ယ်ယူဖတ်ရှုသလို ကိုယ်ကရော သူ့အတွက် ဘယ်လောက်တန်ဖိုးရှိတဲ့ အကြောင်းအရာတွေကို ရရှိသွားစေနိုင်မလဲ....စသည် စသည်ဖြင့်ပေါ့လေ...ကျွန်မရဲ့အတွေးတွေကို နယ်ချဲ့ကြည့်မိခဲ့တယ်။

ဘာပဲ ဖြစ်ဖြစ်ပါလေ.... သေချာတာတစ်ခုကတော့ မျက်နှာဖုံးသက်သက်ကို ကြည့်ရုံမျှနဲ့ စာအုပ်တစ်အုပ်ရဲ့တန်ဖိုးကို ဆုံးဖြတ်လို့မရဘူးဆိုတာကတော့ အမှန်ပါပဲ။



~~~~~~~~~~~~~~~~~~~~~~~~~~~~~~~~~~~~

(မှတ်ချက်။ ။ စာရေးချင်လွန်းလွန်းလို့ စိတ်ထဲမှာရှိနေတဲ့အကြောင်းလေးတစ်ခုကို မနေနိုင်ပဲ ချရေးလိုက်မိတာပါ။ အရမ်းကို အလုပ်တွေများနေတဲ့အတွက် ဒီရက်ပိုင်းမှာ ကိုယ်ကိုယ်တိုင်လည်း စာတွေမရေးဖြစ်သလို မောင်နှမတွေဆီကိုလည်း အားတဲ့အချိန်လေးကျမှသာ လာလည်ရတဲ့အတွက် ခွင့်လွှတ်ပေးကြပါဦးလို့။)

Monday, August 9, 2010

ဆန္ဒတစ်စုံ ပြုမိရုံမှတပါး


“မင်း ဘာလုပ်ဖို့ ဒီကို ထပ်လာတာလဲ”


အံ့သြမှုတစ်ပိုင်းတစ်စ ရောစွက်နေတဲ့ အနည်းငယ်ကျယ်လောင်လှသော ကျွန်မတို့မန်နေဂျာရဲ့ အသံက ကျွန်မအခန်းထဲထိ ပျံ့လွင့်လာတာမို့ ကျွန်မ အလုပ်လုပ်နေရင်းကနေ အခန်းပြင်ကို လှမ်းကြည့်လိုက်မိပါတယ်။

အ၀တ်အစား ခပ်နွမ်းနွမ်းနဲ့ ကျောပိုးအိတ်အဟောင်းတစ်လုံးကို လွယ်ထားတဲ့လူ တစ်ယောက်....ရုံးခန်းထဲသို့ အ၀င်အပေါက်ဝနားလေးမှာ မ၀ံ့မရဲ မတ်တတ်လေးရပ်လို့....။

ကျွန်မ သေသေချာချာစူးစိုက်ပြီး ကြည့်လိုက်တော့မှ “သြော်.....ဟိုနေ့က လူပါလား” ကျွန်မ မှတ်မိလိုက်ပါပြီ။

ပြီးခဲ့တဲ့ အပတ်တုန်းက အင်တာဗျူးဖြေရအောင် လာသွားတဲ့သူ။ အဲဒီနေ့က သူ့ကိုမြင်တော့ ကျွန်မက ထိုင်းအလုပ်သမားတစ်ယောက်လို့တောင် ထင်လိုက်မိသေးတာ။ အဲဒီနေ့ကလည်း သူ့ရဲ့ အသွင်အပြင်က ဒီပုံစံအတိုင်းပါပဲ။

ကျွန်မတို့ရုံးမှာ လူသစ်တွေကို အလုပ်ခန့်ဖို့ခေါ်ရင် အင်တာဗျူးတဲ့အခန်းက ကျွန်မအခန်းနဲ့ကပ်လျက်ဆိုတော့ ဘယ်သူပဲအင်တာဗျူးဖြေဖြေ ကျွန်မကအကုန်မြင်နေ၊ ကြားနေရလေ့ ရှိပါတယ်။ အဲဒီနေ့ကလည်း သူနဲ့မန်နေဂျာနဲ့ အင်တာဗျူးအမေးအဖြေ လုပ်တော့မှ သူ့ကိုမြန်မာမှန်း သိလိုက်ရပါတယ်။ သိသိချင်း နည်းနည်းတောင် အံ့သြသွားမိသေးတယ်။ မြန်မာတော်တော်များများ အင်တာဗျူးလာဖြေရင် တန်ဖိုးကြီးအ၀တ်အစားများ မဟုတ်တာတောင်မှ အနည်းငယ်တော့ သပ်သပ်ရပ်ရပ်နဲ့ ကြည့်ပျော်ရှုပျော်ဖြစ်အောင် ၀တ်စားလာကြတာချည်းပါပဲ။ သူဘာလို့ ဒီလိုပုံစံနဲ့လာရသလဲလို့ပါ။

ဒါပေမယ့် ဒါက အဓိကအကြောင်းအရာတော့ မဟုတ်သေးပါဘူး။ အဓိက အကြောင်းအရာက သူ့ရဲ့ အင်္ဂလိပ်စာ။ မန်နေဂျာနဲ့ သူနဲ့ မေးနေဖြေနေသမျှက အမေးနွားကျောင်းသား၊ အဖြေဘုရားလောင်းဆိုတာမျိုး ဖြစ်နေတယ်။ ပြီးတော့ သူပြောချင်တာကို လုံးစေ့ပတ်စေ့ ရှင်းမပြနိုင်ဘူး။ တဖြည်းဖြည်းနဲ့ မန်နေဂျာရဲ့မေးခွန်းတွေကလည်း သိပ်စိတ်မရှည်ချင်တော့ဘူး။ ကျွန်မလည်း ကိုယ့်မြန်မာလူမျိုးဆိုတဲ့ အသိနဲ့ ဘေးကနေ စိတ်မသက်သာစွာနဲ့ပဲ ကြားနေရပါတယ်။

ဒီလိုနဲ့ပဲ ကျွန်မလည်းအလုပ်ရှုပ်နေတာနဲ့ သူတို့အင်တာဗျူးကို အဆုံးအထိ အာရုံမစိုက်လိုက်ဖြစ်သလို ဘယ်လိုအဆုံးသတ်သွားခဲ့တယ် ဆိုတာလည်း မသိလိုက်ပါဘူး။ ဒီနေ့ဒါသူ့ကို ဒုတိယအကြိမ် မြင်ရခြင်းပါ။

“မင်းကို ငါ အလုပ်မခန့်နိုင်ဘူးလို့ ပြောပြီးပြီလေ”

မန်နေဂျာရဲ့အသံက ဆက်လက်ထွက်ပေါ်လာပါတယ်။

“ငါ....ငါ...ငါ့ကို အခွင့်အရေးတစ်ခုလောက်ပေးပါ”

ထိုသူ၏နှုတ်မှ တွန့်ရွံ့သောလေသံလေးဖြင့် စကားလုံးအချို့ အစီအစဉ်မကျစွာ ထွက်ကျလာလေသည်။

“ငါ....ငါ...ဆိုဒ်ထဲကို အရင်သွားပါရစေ....ငါ့ကို ဆိုဒ်ထဲကို လွှတ်ပါ၊ အခွင့်အရေးတစ်ခု အရင်ပေးပါ”

သူပြောနေသော စကားများကိုခြုံပြီး အဓိပ္ပာယ်ကောက်ရလျှင် သူ့ကို ဆိုဒ်ကို အရင်လွှတ်ပြီး အလုပ်ခိုင်းကြည့်ပါ။ ပြီးမှသူ့ရဲ့ လုပ်ရည်ကိုင်ရည်ကို ဆုံးဖြတ်ကြည့်ပါလို့ ပြောချင်နေပုံပါ။ ဒါပေမယ့် ဆိုလိုတဲ့စကားတွေက လိုရင်းကို မရောက်ပါဘူး။

“ဆောရီးပဲ မင်းဘာတွေပြောနေတာလဲ ငါနားမလည်ဘူး။ မင်းရဲ့အင်္ဂလိပ်စကားကို ငါလုံးဝနားမလည်ဘူး။ ဆိုဒ်ကိုလွှတ်လည်း မင်းရဲ့အင်္ဂလိပ်စာက ဒီလိုပုံစံနဲ့ဆိုရင် ဆိုဒ်ကလူတွေဒုက္ခရောက်မှာပဲ။ အဲဒီတော့ တခြားနေရာမှာပဲ အလုပ်ရှာလိုက်ပါ။ သွားတော့ သွားတော့”

မန်နေဂျာက လက်တစ်ဖက်က ခါးကိုထောက်ကာ လက်တစ်ဘက်က ထိုသူကို လက်ညှိုးတစ်ထိုးထိုးနဲ့ ရုံးခန်းထဲမှ မောင်းထုတ်နေသည့်ပုံစံမျိုး ပြောချလိုက်တဲ့အခါ ကာယကံရှင် ထိုလူကတော့ ဘယ်လိုခံစားရမလဲ မသိပါဘူး။ ရုံးချုပ်ပေါ်မှာ မြန်မာဆိုလို့ တစ်ဦးတည်းရှိသော ကျွန်မကတော့ တစ်ကိုယ်လုံး စပ်ဖျဉ်းဖျဉ်းဖြစ်သွားမိပါသည်။ ငါတို့ မြန်မာလူမျိုးဆိုတဲ့ သွေးက စကားပြောသည်ထင်ပါသည်။

ထိုသူကလည်း အဲဒီလောက်အထိ ပြောနေတာတောင်မှ လှည့်ထွက်မသွားသေးပါဘူး။ တစ်ခုခုကို ထပ်ပြောချင်နေသေးပုံ ရပါသေးတယ်။ မန်နေဂျာကို အသနားခံတဲ့ ပုံစံလေးနဲ့ လှမ်းကြည့်နေပါတယ်။ သူ့ကို ကြည့်ရသည်မှာ ဒီအလုပ်ကိုရဖို့အရေးသည် သူ့အတွက် တကယ့်ကို ကူရာကယ်ရာ မျှော်လင့်ချက်တစ်ခုလိုမျိုးကို ဖြစ်နေပုံပေါ်နေပါတယ်။ ကျွန်မသူ့ကို လှမ်းကြည့်ပြီး စိတ်မသက်သာစွာနဲ့ သက်ပြင်းတစ်ချက်ချလိုက်မိပါတယ်။ ကျွန်မအနေနဲ့ တစ်ခုခုလေး ၀င်ပြောကူညီပေးချင်သော်လည်း ကျွန်မလို သာမန်ဝန်ထမ်းတစ်ယောက်အနေနဲ့ ကုမ္ပဏီရဲ့ရှယ်ယာပိုင်ရှင် အထွေထွေမန်နေဂျာတစ်ယောက်လို လူမျိုးကို ကျွန်မက ဘာများပြောပေးဝံ့မှာတဲ့တုန်း။

“ဆောရီး ဆောရီး .... မင်းကိုငါ လုံးဝအလုပ်မခန့်နိုင်ဘူး။ သွားတော့ သွားတော့ တစ်ခြားနေရာမှာသာ သွားရှာလိုက်တော့”

သူတော်တော်နဲ့ ထွက်မသွားသဖြင့် အတန်ငယ် မာထန်သောလေသံနဲ့ မန်နေဂျာက ထပ်ပြောလိုက်လေသည်။ တစ်ရုံးလုံးမှာရှိတဲ့ ၀န်ထမ်းတွေကလည်း ခေါင်းထောင်ပြီး သူ့ကို လှမ်းကြည့်နေကြပါသည်။ ထိုအခါကျမှပဲ သူလည်း ခေါင်းငိုက်စိုက်ချကာ လေးကန်သော ခြေလှမ်းများဖြင့် ၀င်လာရာ ရုံးတံခါးဝဘက်ဆီသို့ ပြန်လည် လှည့်ထွက်သွားပါတော့သည်။

ကျွန်မလည်း ရင်ထဲမှာ မကောင်းစွာနဲ့ပဲ သူ့မျက်နှာကို တစ်ချက်လှမ်းကြည့်ဖြစ်အောင် ကြည့်လိုက်မိပါသည်။ လှမ်းကြည့်လိုက်တဲ့ တဒင်္ဂမှာပဲ ထိုသူ့မျက်နှာပေါ်က အရိပ်တွေကို ကျွန်မ ဖတ်ရှုလိုက်နိုင်ပါသည်။ ဆုံးရှုံးမှု၊ ရှက်ရွံ့မှု၊ အားလျော့သိမ်ငယ်မှုတွေ စွန်းထင်းပေကျံနေတဲ့ မျက်နှာကိုလှမ်းကြည့်ရင် ကျွန်မရင်ထဲမှာ အမည်မဖော်ပြနိုင်တဲ့ ဝေဒနာတစ်ရပ်ကို ခံစားမိလိုက်သည်။ တစ်ဆက်တည်းမှာပဲ အတွေးတွေက မီးခိုးတွေအမျှင်တန်းသလို ဆက်လက်ပြီး.....။

ထိုသူရဲ့ ဒီလိုပုံစံနဲ့ဆိုရင် အလုပ်ရနိုင်ဖို့အခွင့်အလမ်းက အတော်လေးနည်းပါးမည်ဟု ထင်မိပါသည်။ ဒီနိုင်ငံကို အလုပ်ရှာဖို့ ထွက်လာကြတဲ့သူတွေထဲမှာ ကိုယ်ပိုင်ရှိစုမဲ့စု ပိုက်ဆံလေးတွေကို ကုတ်ခြစ်စိုက်ထုတ် ရင်းနှီးခဲ့ရတာမျိုး ရှိသလို ကိုယ့်မှာအဆင်မပြေရင်လည်း သူတစ်ပါးဆီကနေ ချေးငှားယူခဲ့ရတာမျိုးတွေ ရှိကြတယ်။ ဒီကို ထွက်လာပြီး အလုပ်ရှာကြတဲ့သူတွေဟာ မျှော်လင့်ချက်တွေတသီတတမ်းကို ထမ်းပိုးလာခဲ့ကြရတဲ့သူတွေဖြစ်တယ် ။ သူတို့ကိုမှီခိုနေရတဲ့ နောက်မှာကျန်ရစ်ခဲ့တဲ့ တစ်မိသားစုလုံးရဲ့ မျှော်လင့်ချက်တွေလေ (ပူပင်ကြောင့်ကြစရာမလိုပဲ အဆင်ပြေကြတဲ့ မိသားစုတွေကိုတော့ မဆိုလိုပါဘူး)။ သူတို့တွေရှင်သန်နိုင်မှ နောက်မှာကျန်ရစ်ခဲ့တဲ့ မိသားစုတွေရဲ့ဘ၀ ရှင်သန်နိုင်မယ်။ သူတို့လဲပြိုသွားရင် နောက်မှာ သူ့ကို မှီခိုထားနေရတဲ့ မိသားစုတစ်ခုလုံးလည်း လဲပြိုသွားမယ်။ ဒုက္ခတွေအနည်းနဲ့အများတော့ ရောက်ကြရမှာပါပဲ။

စိတ်မသက်သာစွာ အတွေးတွေ လျှောက်နယ်ချဲ့မိရင်း နောက်ဆုံးမှာတော့ ကျွန်မအနေနဲ့ ဘာမှ ၀င်ရောက်ကူညီ စွမ်းဆောင်ပေးခြင်းငှာ မစွမ်းသာတဲ့ ဖြစ်ရပ်တစ်ခုမှာ ထိုသူ့အနေနဲ့ သင့်လျော်မယ့် အလုပ်အကိုင်တစ်ခုကို အဆင်ပြေစွာနဲ့ အမြန်ဆုံးရှာဖွေ တွေ့ရှိနိုင်ပါစေလို့ ဆန္ဒပြုမိရင်း သက်ပြင်းရှည်တစ်ချက်ကိုသာ မှုတ်ထုတ်လိုက်ရပါတော့တယ်။

~~~~~~~~~~~~~~~~~~~~~~~~~~~~~~~~~~~~~~~~

(မှတ်ချက်။ ။ ရုံးမှာ ကျွန်မကြုံတွေ့ခဲ့ရတဲ့ အကြောင်းအရာလေးတစ်ခုကို မနေနိုင်လို့ ချရေးလိုက်မိတာပါ။ ဒီလိုခေတ်ကျပ်ကြီးမှာ ကိုယ့်နိုင်ငံမှာ အဆင်ပြေပြေ လုပ်ကိုင်စားသောက်ဖို့ရာကျတော့ ကိုယ့်တစ်ကိုယ်စာတောင် မလောက်ငှနိုင်တဲ့ အခြေအနေမျိုးမှာ မိသားစု ဘ၀တွေအတွက် တိုင်းတပါးမှာ လာအလုပ်လုပ်ကြရတယ်။ အဆင်ပြေနေသူတွေ ပြေနေပေမယ့် မပြေသူတွေလည်း ဒုနဲ့ဒေးပါပဲ။ ဘာပဲပြောပြောကိုယ့်မျက်စိရှေ့မှာ မြန်မာလူမျိုးတစ်ယောက်ဒီလိုပုံစံကြုံတွေ့ရတာကို ကျွန်မအနေနဲ့ သူနဲ့ ဘာမှ မပတ်သက်မဆက်စပ်ပေမယ့်လည်း ခံစားရတာတော့ အမှန်ပါပဲ။ အဲဒီဖြစ်ရပ်ကို ကြည့်ပြီး မြန်မာလူမျိုးတွေ အားလုံး မိသားစုနဲ့အတူ မခွဲမခွာအဆင်ပြေပျော်ရွှင်စွာ နေသွားနိုင်ကြမယ့် နေ့ရက်တွေကို အမြန်ဆုံးရောက်ရှိပါစေလို့ ဆန္ဒတစ်စုံကိုပြုမိရုံမှတပါး...)

Tuesday, July 27, 2010

လွင်တီးခေါင်


''အမှတ်တရ'' ဆိုတာ
''အမှားတစ်ရပ်'' တဲ့
ဒါဆိုငါ့မှာ အမှားတွေတော်တော်များနေပြီပဲ။
''အမှတ်တရ'' ဆိုတဲ့ စကား
ထပ်တောင်မှ မကြားလိုတော့ပါဘူး။

''အမှတ်တရ''ရဲ့ အရိပ်တွေနဲ့
အထိတ်တလန့်နေခဲ့ရလို့
စိတ်တံခါးနဲ့နှလုံးအိမ်ကိုသော့ပိတ်
တိတ်ဆိတ်စွာနဲ့ငါ့မှာလေ
ရင်ခုန်သံတွေ သေနေခဲ့တယ်။

လာမငင်ကြပါနဲ့ကွယ်
ဒီနွယ်တွေက ရှင်သန်လာသမျှ
ရင်ခွင်မှာ ဒဏ်ရာဗရပွနဲ့
စိတ်အနာတရ ဖြစ်ရတာတွေချည်းပါပဲ။

တီတီတာတာ
ပလီပလာနဲ့
အကြည်အသာစကားမှန်သမျှကလည်း
နောက်ဆုံးကျတော့
ရင်ကြားကိုထိုးဖောက်သွားတဲ့
လျှာဖျားက အဆိပ်ဓါးတွေချည်းပါပဲ။

လက်တစ်ဖျစ်စာ အိပ်မက်ချိုလေးတစ်ခုအတွက်
ရာစုနှစ် တစ်ခုစာလောက် ငိုကြွေးနေရတဲ့အခါ
ငါ့အတွက် အရာရာက မတန်လိုက်တာ။

ယုံကြည်ခဲ့သမျှတွေကလည်း
ပြောင်းပြန်စီးဆင်း
အရှိန်ကပြင်းလွန်းတော့
အိပ်မက်မြစ်တွေ ခန်းခြောက်သွားတာ
ပက်ကြားတွေတောင် အက်နေခဲ့ပါပေါ့။

နေပါစေတော့လေ
ရွာဖို့လည်း ဒီမိုးကို ငါမမျှော်တော့ဘူး
လာဖို့လည်း ငါမင်းကို မခေါ်တော့ဘူး
ဒီလိုနဲ့ပဲ
တစ်လောကလုံး မိုးတွေသည်းနေတာတောင်မှ
ငါ့တစ်ကိုယ်စာက လွင်တီးခေါင်ဖြစ်နေခဲ့ရတော့တယ်။ ။

~~~~~~~~~~~~~~~~~~~~~~~~~~~~

(အခုတလော စာရေးစာဖတ်ဖို့ဘက်ကို မလှည့်နိုင်ပဲ Facebook ပေါ်မှာပဲ အချိန်တွေ တော်တော်ကုန်နေမိတယ်။ တတ်နိုင်သမျှတော့ ကြိုးစားဖြတ်မယ်လို့ စိတ်ကူးတာပဲ။ ဒီကဗျာလေးက တစ်ခါတည်းချရေးလိုက်တဲ့ ကဗျာမဟုတ်ပါဘူး။ ဟိုတပိုင်းဒီတစ ချရေးထားတဲ့ အပိုင်းအစလေးတွေကို ပြန်ဆက်ထားတာဖြစ်တဲ့အတွက် ဖတ်လို့ အဆင်ပြေချင်မှ ပြေပါလိမ့်မယ်။ ဒါပေမယ့်လည်း ပိုစ့်အသစ်လေးတစ်ပုဒ် တင်ချင်တာနဲ့ပဲ အပိုင်းပိုင်းအပြတ်ပြတ်တွေကို စုပြီးတော့ပဲ တင်လိုက်တယ်။ ဖတ်လို့မကောင်းရင်လည်း ခွင့်လွှတ်ပေးကြပါဦးလို့။)

Thursday, July 8, 2010

ပန်းပွင့်ပုံပြင်


ပန်းတစ်ပွင့် စတင်ဖြစ်တည်မှု


ဥယျာဉ်မှူးရေ.... ရှင် ဘာ့အတွက်ကြောင့်များ ကျွန်မကို စိုက်ပျိုးခဲ့ရသလဲကွယ်။

ထပ်ပြီးတော့ မေးပါရစေဦး။ ပန်းတစ်ပွင့်ကို ရှင်သန်ပွင့်လန်းလာအောင် ပြုစုပျိုးထောင်ပြီးမှတော့ အဲဒီပန်းကို သူ့လက်နဲ့ ကိုယ်တိုင်ခူးဆွတ်ယူဖို့ဆိုတာ ဥယျာဉ်မှူးရဲ့တာဝန် မဟုတ်ပေဘူးလား။

ကျွန်မဒီလို ရှင်သန်လာနိုင်ဖို့အတွက် ရှင်က ရှင့်ရဲ့ မေတ္တာရေစင်တွေနဲ့ ကျွန်မအပေါ်မှာ သွန်းဖျန်းပေးခဲ့တယ်။

ကျွန်မကို စေတနာမြေသြဇာတွေ တိုက်ကျွေးခဲ့တယ်။

ရှင့်ရဲ့အကြင်နာလက်တွေနဲ့ ကျွန်မကိုတူးဆွပေါင်းသင်ပေးခဲ့တယ်။

ရှင့်ကြောင့် ကျွန်မဘ၀က ပန်းပွင့်များစွာတို့ရဲ့အလယ်မှာ သာယာလှပတင့်တယ်ခဲ့ရတယ်။

ဒီဘ၀မှာ ကျွန်မဖူးငုံပွင့်လန်းခဲ့မိတာလည်း ရှင့်တစ်ယောက်တည်းအတွက်ပါ ဥယျာဉ်မှူးရယ်။

တစ်နေ့နေ့မှာ ရှင့်ရဲ့လက်တွေနဲ့ မုချကျိန်းသေ ကျွန်မကိုခူးဆွတ်လာလိမ့်မယ် ဆိုတဲ့ မျှော်လင့်ချက်တစ်ခုတည်းနဲ့ ကျွန်မရှင်သန်ဖြစ်ခဲ့တယ်။

ရှင့်အတွက်ဆိုတဲ့ ရည်ရွယ်ချက်တစ်ခုတည်းနဲ့ပဲ ကျွန်မဆီမှာ အကြင်နာရနံ့တွေ မွှေးထုံပျံ့ခဲ့သလို မေတ္တာဝတ်မှုန်တွေနဲ့လည်း အတိပြီးခဲ့ရတယ်။

ကျွန်မ သိပ်ကိုပျော်ခဲ့တယ်။ စိတ်ကူးတွေနဲ့ရူးခဲ့တယ်။ ပန်းပွင့်တကာတို့ အလည်မှာလည်း တစ်နေ့မှာ ငါ့ရဲ့ပိုင်ရှင်ဟာ ဥယျာဉ်မှူးပဲဖြစ်ရမယ်ဆိုပြီး ၀င့်ဝင့်ကြွားကြွားနဲ့ပေါ့....။

ပန်းတစ်ပွင့် သေဆုံးခြင်း


အို....မဟုတ်ပါစေနဲ့ကွယ်၊ မှားယွင်းခြင်း တစ်စုံတစ်ရာသာ ဖြစ်ပါစေတော့။

ဥယျာဉ်မှူးကပြောတယ်....

သူ ကျွန်မကို ဥပေက္ခာပြု ကျောခိုင်းလိုက်ပြီတဲ့။

သူ ကျွန်မကို ဘယ်တော့မှ လှည့်ကြည့်တော့မှာ မဟုတ်သလို ဘယ်တော့မှလည်း ခူးဆွတ်မှာ မဟုတ်တော့ဘူးတဲ့။

ကျွန်မမှာရှိတဲ့ ဆူးတွေကို သူမုန်းတယ်တဲ့။

ဆူးတွေရှိမယ်မှန်း မထင်မိလို့ သူ ကျွန်မကို ပျိုးခဲ့မိတယ်တဲ့။

ကျွန်မအပေါ်ကို နေဆယ်စင်းရဲ့ အပူရှိန်တွေ တပြိုင်တည်း ကျရောက်လာသလိုမျိုး ကျွန်မခံစားလိုက်ရတယ်။

မဟုတ်သေးဘူး....မဟုတ်သေးပါဘူး ဥယျာဉ်မှူးရယ်....။

ရှင့်ရဲ့ ထင်မြင်ချက်တွေ လွဲမှားသွားခဲ့ပြီ။

ဒီဆူးတွေက ရှင့်အတွက် မဟုတ်ရပါဘူး။

ရှင့်တစ်ယောက်တည်းရဲ့ အမြတ်တနိုး ဆွတ်ချူရယူခြင်းကိုသာ မျှော်လင့်မိတဲ့ ကျွန်မ....ဒီဆူးတွေကလေ.... ကျွန်မကို ခူးဆွတ်ဖို့ဟန်ပြင်နေကြတဲ့ အခြားအခြားသောသူတွေ လာရောက်ခူးဆွတ်ကြမှာကို စိုးရိမ်မိတဲ့အတွက်ကြောင့် ကျွန်မကိုယ်ကျွန်မ ကာရံထားမိတာပါ။

ဥယျာဉ်မှူးရေ....ကျွန်မလေ....
ဥယျာဉ်မှူးရေ....ကျွန်မ.....
ဥယျာဉ်မှူးရေ....
ဥယျာဉ်မှူးရေ
........

ကျွန်မ ငိုကြွေးခဲ့တယ်။ နေ့ညမပြတ် သည်းသည်းထန်ထန် ငိုကြွေးခဲ့တယ်။

နှလုံးသားတွေကွဲအက်ပြီးမှ ထွက်ပေါ်လာတဲ့ ကျွန်မရဲ့ ရင်ရှိုက်သံက ကမ္ဘာလောကကြီးတစ်ခုလုံးကိုတောင် လွှမ်းသွားခဲ့ရပြီး၊ တောင်စွယ်တောင်တန်းတွေ ကျောက်ဆောင်ကျောက်ကမ်းပါးတွေဆီမှာတောင် ပဲ့တင်ထပ်ပြီးနေခဲ့ပေမယ့် ဥယျာဉ်မှူးဆီက ကျွန်မပြန်ရလိုက်တာတွေကတော့....

သူ့ရဲ့ရက်စက်ခြင်းတရားတွေနဲ့ လောင်းချခြင်းကို ခံခဲ့ရတယ်။

သူကျွေးတဲ့ ဥပေက္ခာတရားတွေကို ရင်နှင့်မမျှအောင် စားသုံးခဲ့ရတယ်။

နာကျင်ကြေကွဲခြင်း ဒဏ်ရာတွေအတိနဲ့သာ ပြည့်နှက်နေတဲ့ ကျွန်မ တဖြည်းဖြည်းနဲ့ လောကကြီးကို စွန့်ခွာသွားရတော့မယ်။

ကျေးဇူးပြုပြီး ကျွန်မသေဆုံးသွားပြီးတဲ့အခါ ကျွန်မရဲ့ခန္ဓာကိုယ်ကို အဝေးကို လွှင့်မပစ်လိုက်ကြပါနဲ့.....ဥယျာဉ်မှူးရဲ့ ဒီဥယျာဉ်လေးထဲမှာပဲ မြုပ်နှံပေးကြပါ။

သူ့ရဲ့ ဥယျာဉ်မြေပေါ်မှာ ပန်းပင်တွေနဲ့ ထာဝရလှပစွာ ရှင်သန်ပွင့်လန်းနိုင်စေဖို့ အထောက်အပံ့အနည်းငယ်မျှဖြစ်ပါစေ ရသွားနိုင်မယ့် မြေဆွေး၊ မြေသြဇာ အဖြစ်လေးနဲ့ နေခွင့်ရခဲ့ရင်တောင် ကျွန်မကျေနပ်ပါတယ်။

အသည်းတွေပျက်ကြွေသည်အထိ ငိုကြွေးခဲ့ရတဲ့ ကျွန်မရဲ့ မျက်ရည်တွေကလည်း ဥယျာဉ်ထဲမှာ စမ်းချောင်းလေးတွေအဖြစ် ထာဝရစီးဆင်းနိုင်ပြီး သူ့ရဲ့မြေကို အကျိုးပြုနိုင်ပါစေ....

အရာအားလုံးကို နှုတ်ဆက်ခဲ့ပါတယ်.....ကျွန်မသွားတော့မယ်

နောက်ဆုံးအနေနဲ့ တစ်ခွန်းလောက်တော့ ပြောခဲ့ပါရစေဦး....

ဥယျာဉ်မှူးရေ....ရှင်သိပ်ရက်စက်တယ်။

ပြစ်မှုမထင်ရှားဘဲ ရာဇ၀တ်မှုမမြောက်ဘဲနဲ့ ရှင်ဟာ ပန်းတစ်ပွင့်ကို သေစေခဲ့တယ်။

~~~~~~~~~~~~~~~~~~~~~~~~~~~~~~~~~~~~~~~~~~~~

(မှတ်ချက်။ ။ဘာရယ်လို့ မဟုတ်ပါဘူး။ Bambino ဆိုထားတဲ့ ကျွန်မအရမ်းကြိုက်တဲ့ သီချင်းလေးဖြစ်တဲ့ “ပန်းတပွင့်” ဆိုတဲ့ သီချင်းလေးကို နားထောင်ပြီး ပန်းပွင့်လေးတစ်ပွင့်နေရာကနေ ၀င်ခံစားရေးကြည့်တာပါ။)

Sunday, June 27, 2010

လူ့သပြုသီး၊ လူ့သံပုရာသီး

ကျွန်မအလုပ်လုပ်နေတဲ့ကုမ္ပဏီရဲ့လုပ်ငန်းလိုအပ်ချက်အရ ကျွန်မအနေနဲ့ ပြီးခဲ့တဲ့ အပတ်အထိ ဆိုဒ်ရုံးမှာ ယာယီသွားနေခဲ့ရပါတယ်။ ဆိုဒ်ရုံးဆိုတာက သိတဲ့အတိုင်း ရုံးချုပ်နဲ့ မတူဘူးလေ။ လွတ်လပ်မှုရှိတယ်။ တစ်ယောက်နဲ့ တစ်ယောက် ရင်းရင်းနှီးနှီး နွေးနွေးထွေးထွေး စဟယ်နောက်ဟယ်နဲ့ ပျော်စရာလည်း ကောင်းပါတယ်။ နောက်တစ်ခုက ကျွန်မ အခုသွားနေခဲ့ရတဲ့ ဆိုဒ်ရုံးက မန်နေဂျာရော အင်ဂျင်နီယာတွေပါ မြန်မာတွေချည်းပါပဲ။

ကျွန်မတို့ရဲ့ မြန်မာမန်နေဂျာက ရခိုင်လူမျိုးပါ။ စိတ်ရင်းကောင်းလှတဲ့အပြင် နောက်နောက်ပြောင်ပြောင်နဲ့ ရီစရာများကိုလည်း ပြောတတ်ပါတယ်။ ကျွန်မကိုဆိုရင်လည်း ရခိုင်ပြည်နယ်နဲ့ ရခိုင်လူမျိုးတွေအကြောင်း၊ ရခိုင်ဓလေ့ထုံးစံတွေ အကြောင်းကိုလည်း မကြာခဏပြောပြလေ့ရှိတယ်။ ရခိုင်မုန့်တီချက်သောက်တဲ့ အကြောင်းကိုများဆိုရင် ပီပီပြင်ပြင် ကွက်ကွက်ကွင်းကွင်း မြင်သာထင်သာ ရှိအောင် ပြောပြတတ်လွန်းလို့ ကျွန်မမှာ တံတွေးတွေ မျိုမျိုချရတာဆိုတာ အကြိမ်ကြိမ်။

ကျွန်မဆိုဒ်ရုံးမှာ နေနေရစဉ် အတောအတွင်းမှာပဲ နောက်ထပ် မြန်မာအင်ဂျင်နီယာ ဦးကြီးတစ်ယောက် တစ်ခြားကုမ္ပဏီကနေ ပြောင်းလာပါတယ်။ မန်နေဂျာဦးကြီးနဲ့ အဲဒီအင်ဂျင်နီယာဦးကြီးနဲ့က အသက်တွေမတိမ်းမယိမ်းတွေပါပဲ။ ၄၅နဲ့ ၅၀ကြားတွေမှာ ရှိကြပါတယ်။ ကျွန်မနဲ့ဆိုရင် တူမနဲ့ ဦးလေးတွေလိုပဲ ပြောပါတော့။

ဒီလိုနဲ့ တစ်ရက် ကျွန်မမန်နေဂျာက သူ့စားပွဲမှာ အလုပ်လုပ်နေရင်းကနေ ကျွန်မဘက်ကိုလှည့်ပြီး (သူ့စားပွဲနဲ့ ကျွန်မစားပွဲနဲ့က ကျောချင်းကပ်ရက်ပါ)

“ဒီတစ်ပတ်တနင်္ဂနွေနေ့ သူငယ်ချင်း တစ်ယောက်ရဲ့ မင်္ဂလာဆောင်ရှိတယ်ဟေ့။ နေရာက အင်ကြင်းတို့နားက ဘုန်းကြီးကျောင်းမှာလေ။ အဲဒီသူငယ်ချင်းက အသက်က ၄၆နှစ်ရှိပြီ။ သူယူမယ့်ကောင်မလေးက အသက်၂၀တဲ့။ ကြည့်ပါဦး.....”

သူက ပြောလည်းပြော ရီလည်းရီကာ သူရတဲ့ ဖုံးမက်ဆေ့ကို ကျွန်မကို လှမ်းပြပါတယ်။

“ဟယ်....ဟုတ်လား။ အသက်က လည်း ကွာလိုက်တာနော်....”













ကျွန်မကလည်း ရီရီမောမောနဲ့ ပြန်ပြောရင်း သူပြတဲ့ မက်ဆေ့ကိုလည်း လှမ်းကြည့်ရင်းပေါ့။ (သူနဲ့ ကျွန်မနဲ့က ရီစရာများပြောပြီဆိုရင် တော်တော် အတိုင်ဖောက်ညီပါတယ်။)

အဲဒီအချိန်မှာပဲ ခုနအင်ဂျင်နီယာ အသစ်ဦးကြီးကလည်း ခုံတစ်ခုံကို သွားဆွဲယူလာပြီး ကျွန်မတို့နှစ်ယောက်ရဲ့ အလယ်မှာ ထိုင်လိုက်ပြီး မန်နေဂျာဦးကြီးပြောပြနေတာတွေကို ၀င်နားထောင်ပါတယ်။ တဆက်တည်းမှာပဲ မန်နေဂျာဦးကြီးက ....

“သပြုသီးဆိုတာကို ခင်ဗျားတို့ကြားဘူးကြလား။ ကျွန်တော်တို့ ရခိုင်မှာဆို အရမ်းပေါတာ....သူ့က အရသာက ချဉ်တင်တင် ဖန်တွတ်တွတ်နဲ့ ....။ ဟင်းချက်စားလို့တအားကောင်းတာဗျ....။”


ကျန်တဲ့ ကျွန်မတို့နှစ်ယောက်ကလည်း သပြုသီးဆိုတာကို ကြားရုံပဲ ကြားဖူးပြီး မမြင်ဖူး၊ မစားဖူးကြောင်းများကို ပြောကြပါတယ်။ ဒါနဲ့သူက....

“ခင်ဗျားတို့ကို တစ်ခု ပြောပြမလို့ဗျ .... ”

ကျွန်မတို့နှစ်ယောက်ကလည်း စိတ်ဝင်တစားနဲ့ပေါ့.....

“ကျွန်တော်တို့ ရခိုင်ပြည်မှာဆိုရင် ခုနလိုမျိုး အသက်ကြီးခါမှ မိန်းမငယ်ငယ်လေး ယူကြတဲ့သူတွေကို လူ့သပြုသီးလို့ ခေါ်ကြတယ်။ လူ့သံပုရာသီးနဲ့ အဓိပ္ပာယ်တူတယ်။ ဆိုလိုချင်တာကတော့ဗျာ.... အဲလိုလူမျိုးတွေဟာ ဂွတီးဂွကျ အချိုးအပေါက်ကမပြေ လူ့ကန့်လန့်တွေဖြစ်ပြီးတော့ ငယ်ငယ်တုန်းက မစွံနိုင်ခဲ့ကြဘဲ အသက်ကြီးကာမှ မိန်းမက လိုချင်လာပြန်တော့ ဒီလိုမိန်းမငယ်ငယ်လေးတွေကို ကောက်ယူကြတဲ့သူတွေ ကြီးလေချဉ်လေ ဆိုပြီး ပြောတဲ့သဘောပေါ့ဗျာ....ဟားဟား....”

သူက အဲဒီလို အာပေါင်အာရင်းသန်သန်နဲ့ ပြောပြီး တဟားဟားနဲ့ ရီပါတော့တယ်။ ကျွန်မကလည်း ဘယ်နေလိမ့်မလဲ .... သူပြောတာကို အပြည့်အ၀ ထောက်ခံတဲ့ အနေနဲ့ တ၀ါးဝါး ရီမိတာပေါ့.....။

ကျွန်မတို့နှစ်ယောက်ကသာ တဟားဟား တ၀ါးဝါး ရီနေပေမယ့် ခုနက အင်ဂျင်နီယာအသစ်ဦးကြီးကတော့ လိုက်မရီပဲ ပြုံးရုံလေးပြုံးပြီး ခေါင်းလေးကိုလည်း တဆတ်ဆတ်ညိတ်နေပါတယ်။ ပြီးမှ ထိုင်နေရာကနေ ရုတ်တရက် ထရပ်လိုက်ပြီး....

“ဒါဆိုရင်တော့ အဲဒီလူ့သပြုသီး၊ လူ့သံပုရာသီးဆိုတာတွေထဲမှာ ကျွန်တော်နဲ့ ကျွန်တော့်အဖေနဲ့ ပါသွားပြီပေါ့ဗျာ.... ကျွန်တော့်အဖေနဲ့ အမေက အသက်၂၀ကွာတယ်.... ကျွန်တော်နဲ့ ကျွန်တော့်မိန်းမနဲ့က ၁၂နှစ်ကျော် ၁၃နှစ်နီးပါးကွာတယ်ဗျ.....”

ဆိုပြီး သူ့စားပွဲသူပြန်သွားပါတယ်။

“ဟင်......”

ကျွန်မတို့နှစ်ယောက်လည်း တ၀ါးဝါးရီနေရာကနေ တုံ့ကနဲ ရပ်သွားပြီး တစ်ယောက်မျက်နှာ တစ်ယောက် လှမ်းကြည့်လိုက်ကြပြီး ကျွန်မကတော့ ကပြာကယာ ကျွန်မစားပွဲဘက်ကို ပြန်မျက်နှာမူလိုက်ပြီး အလွန်အင်မတန်မှ ရီချင်နေတဲ့ ကျွန်မကိုယ်ကျွန်မ အသံထွက်မသွားမိအောင် အောက်နှုတ်ခမ်းတွေကို သွားနဲ့ဖိကိုက်ထားပြီး ခေါင်းကြီးကို အောက်ငုံ့ကာ အတွင်းထဲကနေသာ လှိုက်လှိုက်ပြီး အူတက်နေမိပါတော့တယ်။ သြော်..... တိုက်ဆိုင်လိုက်လေခြင်း...။ မိန်းမငယ်ငယ်လေး ယူထားတဲ့ သူကို အလယ်တည့်တည့်မှာ ထားပြီး လူ့သပြုသီး အကြောင်းကို ပယ်ပယ်နယ်နယ် အဓိပ္ပာယ်ဖွင့်ပြီး ပွဲကျနေကြတာလေ။ (နောက်မှသိရတာ အဲဒီဦးကြီးက အိမ်ထောင်ကျတာလည်း သိပ်မကြာသေးဘူးတဲ့။ ကလေးလေးကမှ အခုဆို ဆယ်လသားလေးပဲ ရှိပါသေးတယ်တဲ့။)

မန်နေဂျာ ဦးကြီးကလည်း ..... အားတုံ့အားနာ လေသံကြီးနဲ့....

“အင်း....အဲ....ဒါပေမယ့် ခင်ဗျားနဲ့ ခင်ဗျား အဖေနဲ့က ကျွန်တော့်သူငယ်ချင်းလောက်တော့ မဆိုးသေးပါဘူးဗျာ...အဟဲ....”

ဆိုပြီး ပြေရာပြေကြောင်း လှမ်းပြောပေမယ့် ဟိုဘက်ကတော့ ဘာသံမှ ပြန်ထွက်မလာတာနဲ့ သူလည်း သူ့စားပွဲဘက်သူလှည့်ကာ ဖုံးကြီးကောက်ကိုင်ပြီး ဟိုလူ့ဖုံးခေါ်လိုက် ဒီလူ့ဖုံးခေါ်လိုက်နဲ့ ဖုံးတွေသာ တရစပ် ဆက်နေပါတော့တယ်။

ကျွန်မမှာလည်း အဲဒီလို ခေါင်းကြီးငုံ့ နှုတ်ခမ်းကိုက်ပြီး ဘယ်လောက်ကြာကြာ အသံတိတ် ရီနေမိမှန်းကို မသိတော့တဲ့အပြင် နောက်ပိုင်းမှာ အဲဒီအင်ဂျင်နီယာဦးကြီးကို တွေ့တိုင်းလည်း မန်နေဂျာကြီးပြောတဲ့ လူ့သပြုသီး၊ လူ့သံပုရာသီးရဲ့ အဓိပ္ပာယ်ဖွင့်ဆိုချက်ကို သွားသွားသတိရပြီး တစ်ယောက်တည်း ပြုံးမိနေတော့တာပါပဲ။

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

(မှတ်ချက်။ ။ဘောလုံးပွဲမှာ အီတလီရှုံးပြီး ပြန်သွားရတာနဲ့ပဲ လူလည်းတော်တော်ခံစားလိုက်ရပါတယ်။ အဲဒါနဲ့ စိတ်ညစ်ညစ်နဲ့ ရီစရာလေးတွေ ရှာကြံတွေးရင်း ဒီအဖြစ်လေးကို သွားသတိရပြီး ချရေးလိုက်မိတာပါ။သပြုသီးအကြောင်းကိုသိအောင် ထပ်မံပြောပြပေးတဲ့ ရခိုင်မလေး ညီမလေး မေချိုချိုထွန်းကိုလည်း ကျေးဇူးတင်ပါတယ်။ )

Sunday, June 13, 2010

ဇွန် ၁၃မှာမွေးသောသူ



အခုလို မိုးတွေရွာနေတဲ့ အေးချမ်းတဲ့ ဇွန်လရဲ့ နံနက်ခင်းလေး တစ်ခုမှာပေါ့ ..... ကျွန်မကို မေမေက မွေးဖွားခဲ့တာလေ။ အဲဒီနေ့လေးက အင်္ဂလိပ်လို ဆိုရင်တော့ ဇွန် ၁၃၊ မြန်မာလို ဆိုရင်တော့ နယုန်လဆုတ် ၇ ရက်နေ့ဖြစ်ပါတယ်။ တနင်္ဂနွေသမီးဖြစ်တဲ့ ကျွန်မကို ဖေဖေ၊ မေမေတို့က အင်ကြင်းသန့် ဆိုတဲ့ နာမည်လေးကို ပေးခဲ့ကြတယ်။ မေမေက ပြောဘူးတယ်။ ကျွန်မငယ်ငယ်တုန်းက ပုခက်ပေါ်မှာ မအိပ်ဘူးတဲ့။ အိပ်ပြီဆိုရင် လူပေါ်မှာ အမြဲချီထားရတယ်တဲ့။ လူပေါ်ကနေ ချလိုက်တာနဲ့ ငိုတော့တာပဲတဲ့။ အဲဒီတော့ ဖေဖေနဲ့ မေမေ့မှာ အမြဲ တစ်လှည့်စီ ငုတ်တုတ်ထိုင်ပြီး ပေါင်ပေါ်မှာ ကျွန်မကို တင်ထားပြီး အိပ်ရတယ်တဲ့လေ။

ဒါတွေကို ကျွန်မကြီးလာတော့ ဖေဖေနဲ့ မေမေက ရီစရာလိုလို ပြန်ပြောပြခဲ့တာပါ။ ငယ်ငယ်တုန်းကတော့ ရီနိုင်ခဲ့ပေမယ့် အခုတော့ ပြန်တွေးမိရင် မရီနိုင်တော့ပါဘူး။ စိတ်ထဲမှာလည်း မကောင်းဘူး။ ဖေဖေနဲ့ မေမေ အဲဒီတုန်းက ဘယ်လောက်များ ဒုက္ခများလိုက်မလဲလို့ တွေးလိုက်မိတိုင်း စိတ်မကောင်းဖြစ်ရတယ်။

ဒီလိုနဲ့ ကျွန်မ တဖြည်းဖြည်း ကြီးလာတော့ အခုထိ ပြောစမှတ်ဖြစ်ကျန်တဲ့ အဖြစ်တစ်ခုက ရှိသေးတယ်။ ကျွန်မဟာ နံနက်တိုင်း မိုးလင်းပြီဆိုတာနဲ့ မုန့်ဟင်းခါး စားချင်လို့ မစားရမချင်းကို ဂျီကျတော့တာပဲတဲ့။ ဘယ်လောက်များ ဂျီကျသလဲဆိုရင် ကျွန်မတို့ ဘေးအိမ်က လူတွေက ကျွန်မရဲ့နာမည်ရင်း အင်ကြင်းကို အင်ကြင်းလို့ မခေါ်ဘဲ ဂျီဂျင်း ဆိုပြီးတော့ကို ပြောင်းခေါ်တဲ့ အထိပဲတဲ့လေ။

မေမေက ကျောင်းဆရာမဆိုတော့ ကျွန်မကို မွေးဖွားပြီး မကြာခင်မှာပဲ ကျောင်းပြန်တက်ရတယ်။ အဲဒီတော့ ကျွန်မက အိမ်မှာ ကျွန်မကိုထိန်းဖို့ခေါ်ထားတဲ့ အစ်မကြီးနဲ့ ကျန်ခဲ့ရပါတယ်။ ကျွန်မတို့က အစိုးရ ၀န်ထမ်းလိုင်းမှာနေတာဆိုတော့ ဖေဖေ့ရုံးနဲ့ နီးတယ်လေ။ ကျွန်မဟာ သိတတ်တဲ့ အရွယ်ကတည်းက ဖေဖေ ထမင်းလာမကျွေးမချင်း မစားဘူးတဲ့။ အဲဒီတော့ ဖေဖေဟာ ဘယ်လောက်ပဲ အလုပ်တွေ ရှုပ်နေပါစေ။ ကျွန်မ ထမင်းစားဖို့ အချိန်ရောက်လာတာနဲ့ ရုံးက ပြန်လာပြီး ကျွန်မကို ထမင်းကျွေးရတယ်တဲ့လေ။

ဒီလိုနဲ့ ကျောင်းနေရတဲ့ အရွယ်ကိုရောက်လာရော ပြောပါတော့။ ကျွန်မ သူငယ်တန်းတက်တဲ့ နှစ်မှာ မေမေက ညီမလေးကို ကိုယ်ဝန်ဆောင်ထားရတယ်။ ဒါ့အပြင် ကျွန်မကလည်း ကျောင်းနေရပြီဆိုတော့ကာ မေမေက သူ့ရဲ့ ကျောင်းဆရာမအလုပ်ကနေ နှုတ်ထွက်လိုက်ရပါတယ်။ ကျွန်မ ကျောင်းစနေတော့ ဘယ်လောက်ထိ ဆိုးသလဲဆိုရင် မေမေက ကျွန်မစာသင်ရတဲ့ စာသင်ခန်းကနေ လှမ်းမြင်ရတဲ့ နေရာမှာ ကျွန်မမြင်သာအောင် အမြဲစောင့်နေပေးရတယ်။ ကျွန်မက စာသင်နေရင်းကနေ မေမေ့ကိုပဲ လှမ်းလှမ်းကြည့်နေတာလေ။ မမြင်လို့ကတော့ ထွန့်ထွန့်လူးအောင် ငိုပြီသာမှတ်ပေတော့ပဲ။

ကျွန်မ မှတ်မိသေးတယ်။ အဲဒီတုန်းက ကျောင်းအုပ်ဆရာမကြီးက တော်တော်ဆိုးပါတယ်။ မိဘတွေကို အဲဒီလို မစောင့်ခိုင်းဘူး။ ငိုရင် ငိုတဲ့ကလေးကို လျှာဖြတ်ပစ်မယ်ဆိုပြီး ခဲတံချွန်တဲ့ဓါး သေးသေးလေးကို ပြပြီးတော့လည်း ခြိမ်းခြောက်တတ်ပါသေးတယ်။ ဒါပေမယ့် ကျွန်မကတော့ ဘယ်သူတွေ ဘယ်လိုပဲ ခြိမ်းခြောက် ခြိမ်းခြောက် မရပါဘူး။ မေမေ့ကို မမြင်တာနဲ့ အာခေါင်ကို ခြစ်ပြီး ငိုတော့တာပါပဲ။ အခုနေမှာ ကျွန်မ ပြန်တွေးမိတယ်။ ညီမလေးရဲ့ ကိုယ်ဝန်ကြီးနဲ့ မေမေဟာ ကျွန်မကို တစ်နေကုန် ကျောင်းမှာ အဲဒီလို စောင့်ပေးနေရတာ ဘယ်လောက်များ ပင်ပန်းလိုက်မလဲလို့လေ။ ကျွန်မဟာ ဘာလို့ အဲဒီလို ကလေးဆိုးလေး ဖြစ်ခဲ့တာလဲ။ ပြန်တွေးမိတိုင်း ရင်ထဲမှာ ထိထိခိုက်ခိုက် ခံစားရတယ်။

ဒီလိုနဲ့ မေမေက ညီမလေးကို မီးဖွားတော့ ကျွန်မကို လိုက်မကြည့်နိုင်တော့ကာ ကျွန်မရဲ့ အစ်မ၀မ်းကွဲ (ဆယ်တန်းကျောင်းသူ)ကို ကျောင်းမှာ ကျွန်မကို ကြည့်ရှုစောင့်ရှောက်ဖို့၊ မုန့်တွေဘာတွေဂရုစိုက်ပြီး ၀ယ်ကျွေးဖို့ မှာထားပါတယ်။ ကျွန်မက ငယ်ငယ်က အဆုတ်မကောင်းတော့ ဆရာဝန်က ကျွန်မကို ဇီးထုပ်တို့၊ ရေခဲချောင်းတို့ မကျွေးရဘူးလို့ မှာထားတယ်။ အဲဒီတော့ကာ ဖေဖေနဲ့ မေမေက အဲဒါနဲ့ ပတ်သက်လို့ အရမ်းဂရုစိုက်တယ်။ ဒါပေမယ့် ကျွန်မကလည်း မတည့်ပါဘူးဆိုတဲ့ ဇီးထုပ်နဲ့ ရေခဲချောင်းကိုမှ ရွေးကြိုက်တဲ့သူ ဆိုတာလိုမျိုး ဖြစ်နေတယ်။ တစ်နေ့ တစ်နေ့ ၀ယ်စားလိုက်သမျှ ဇီးထုပ်နဲ့ ရေခဲချောင်းကြီးပဲ ။ ကျွန်မ အစ်မကလည်း ကျွန်မကို ပြောမရမှန်း သိတော့ ဘာမှမပြောတော့ပါဘူး။ သူက ဘာပဲလုပ်သလဲဆိုတော့ ကျွန်မ၀ယ်စားသမျှ ဇီးထုပ်နဲ့ ရေခဲချောင်းအရေအတွက်ကို မှတ်ထားပြီး ညနေကျရင် မေမေ့ကို အကုန်ပြန်ပြောပြတယ်လေ :))) ။

ဒါတင်မကသေးပါဘူး။ ကျွန်မတို့ ငယ်ငယ်က ဗွီဒီယိုပြစက်ဆိုတာ အိမ်တိုင်းမှာ မ၀ယ်နိုင်သေးပါဘူး။ ကျွန်မတို့ မိသားစုနေတဲ့ ၀န်ထမ်းလိုင်းခန်းတွေရှိတဲ့ ကွင်းတစ်ကွင်းလုံးမှာမှ ဗွီဒီယိုပြစက်ရှိတဲ့ အိမ်က အရာရှိပိုင်း အိမ် နှစ်အိမ်လောက်မှာပဲ ရှိတာပါ။ အဲဒီမှာပဲ ကျွန်မတို့နဲ့အတန်ငယ်ဝေးတဲ့ ရပ်ကွက်မှာ ဗွီဒီယိုရုံဆိုတာ စတင်ပေါ်ပေါက်လာပါတယ်။ လူကြီးတွေက ဗွီဒီယိုရုံဆိုတာ လူစုံတယ်၊ စရိုက်စုံတယ်၊ ကလေးတွေအတုယူမှားရင် ပျက်စီးလွယ်တယ်ဆိုတဲ့ အကြောင်းပြချက်တွေနဲ့ ဗွီဒီယိုရုံမှာ ဗွီဒီယိုသွားကြည့်ခြင်းကို ခွင့်မပြုကြပါဘူး။ အဲဒီမှာပဲ ကျွန်မ အစ်ကိုက တခြား အစ်ကိုဝမ်းကွဲတွေနဲ့ အတူ အဲဒီဗွီဒီယိုရုံမှာ မေမေတို့မသိအောင် ဗွီဒီယိုသွားသွားကြည့်တတ်ပါတယ်။ အဲဒီတော့ သူတို့တွေ အချင်းချင်း ပြောဆိုနေကြတာတွေကို ကြားပြီး ကျွန်မရဲ့စိတ်ထဲမှာလည်း ဗွီဒီယိုဆိုတာ ဘာလဲ၊ တီဗွီနဲ့ ဗွီဒီယိုဘာကွာသလဲဆိုတာကို အရမ်းကိုစိတ်ဝင်စားမိပြီး အရမ်းလည်း လိုက်သွားကြည့်ချင်နေမိပါတယ်။

ဒါနဲ့ တစ်ခါတော့ မေတ္တာနဲ့ ကွမ်းသီးရိုက်ထားတဲ့ ဗွီဒီယိုဇာတ်ကားတစ်ကားက အရမ်းကို နာမည်ကြီးနေပါတယ်။ ကျွန်မအစ်ကိုတွေက အဲဒီကားကို သွားကြည့်မယ်ဆိုတာကိုလည်း ကျွန်မက သိနေတော့ အရမ်း လိုက်သွားချင်နေတယ်။ ကိုကြီးကလည်း မေမေ့အဆူခံရမှာစိုးလို့ ကျွန်မကို မလိုက်ခိုင်းဘူး။ ကျွန်မကလည်း ဘယ်လိုတားတား မရပါဘူး။ ဖြစ်ချင်တော့ အဲဒီအချိန်မှာပဲ အိမ်ကို ဧည့်သည်တွေ ရောက်လာပါတယ်။ ကျွန်မကလည်း ရသမျှအခွင့်အရေးကို လက်လွတ်မခံပဲ မေမေက ဧည့်သည်တွေကို ဧည့်ခံစကားပြောနေတုန်း ကျွန်မအစ်ကိုတွေနောက်ကို ဗွီဒီယိုကြည့်ရအောင် တိတ်တိတ်လေး လိုက်သွားပါတော့တယ်။

ပြန်လည်းလာရော ဒေါသတွေထွက်နေတဲ့ မေမေ့ကို ကျွန်မက မလိမ်မညာဘဲ အမှန်အတိုင်း ဗွီဒီယိုသွားကြည့်တာလို့လဲ ပြောလိုက်ရော ဘာပြောကောင်းမလဲ၊ မေမေက မောင်နှမ နှစ်ယောက်စလုံးကို ပေါင်တွင်းကြောတွေကို လိမ်ဆွဲတာများ အသားတွေ ပြတ်ထွက်ခမန်းပါပဲ။ နှစ်ဘက်စလုံးမှာ ရက်တော်တော်ကြာကြာကို အညိုအမည်းတွေ စွဲလို့ပါပဲ။ ကျွန်မကလည်း ကိုယ်က အပြစ်လုပ်ထားမိတာဆိုတော့ ဘယ်လောက်ပဲနာနာ မျက်ရည်တစ်စက်မကျ ကျိတ်ခံပါတယ်။

အဲဒီလိုပဲ မေမေ အတန်တန်တားနေတဲ့ ကြားထဲက မေမေ မသိအောင် လိုက်သွားကြည့်ခဲ့တာ နောက်တစ်ခုရှိသေးတယ် ..... နတ်ပွဲလေ။ မေမေက ကျွန်မတို့နားမှာ နတ်ပွဲတွေကပြီဆိုရင် ဘယ်တော့မှ လိုက်မကြည့်ခိုင်းပါဘူး။ အဓိက မေမေစိတ်ပူတာက နတ်ပွဲဆိုတာ လူတွေ တအားရှုပ်တဲ့ အပြင် နတ်ကတော်တွေက ကြည့်နေတဲ့ ပရိတ်သတ်ထဲက လူတွေကို ဆွဲဆွဲခေါ်ပြီး ကတတ်လို့ မေမေက စိတ်ပူတာပါ။ ဒါကြောင့်လည်း အကျိုးအကြောင်း ကျွန်မကို သေချာနားလည်အောင် ရှင်းပြပြီး မသွားရဘူးလို့ ပြောထားပါတယ်။ ဒါပေမယ့် ခက်တာက ကျွန်မရဲ့စိတ်။ မေမေပြောသလို ဟုတ်သလား။ နတ်ပွဲဆိုတာ ဘယ်လိုမျိုးလဲ။ နတ်တွေဆိုတာရော တကယ်ရှိတာလား။ကိုယ်တိုင် သွားကြည့်ချင်တယ်။ မြင်ဘူးချင်နေတယ်။

အဲဒါနဲ့ နတ်ပွဲရှိနေတဲ့ တစ်ရက် နေ့ခင်းပိုင်း မေမေတရေးတမော အိပ်ပျော်နေတဲ့ အချိန် အစ်မ၀မ်းကွဲနဲ့ တိတ်တိတ်လေး လိုက်သွားပြီး နတ်ပွဲကို သွားကြည့်ပါတယ်။ ပြန်လည်းလာရော ထုံးစံအတိုင်းပေါ့။ မေမေက နတ်ပွဲသွားကြည့်တာဆိုတာကို သိလည်းသိရော ဒေါသတွေထွက်ပြီး ရိုက်လည်းရိုက်၊ ပေါင်တွင်းကြောတွေကိုလည်း လိမ်ဆွဲကာ ကျွန်မကိုအရမ်းကို စိတ်ဆိုးခဲ့ပါတယ်။

အဲဒီတုန်းက မေမေဘယ်လောက်ထိ ဒေါသထွက်လိုက်မလဲဆိုတာ ကျွန်မကြီးလာတော့ တဖြည်းဖြည်းတွေးလာမိတယ်။ မသွားပါနဲ့လို့ အကျိုးအကြောင်းပြောထားပြီး သေချာမှာထားတဲ့ကြားထဲက ကျွန်မက သွားဖြစ်အောင်သွားခဲ့တာလေ။ နောက်ပြီး ကျွန်မရဲ့ အကျင့်တစ်ခုက မေမေ့ကိုကျွန်မ လိမ်မပြောတတ်ခဲ့တာပါပဲ။ မေမေမကြိုက်တာကို ကျွန်မလုပ်ခဲ့တယ်။ ကျွန်မအနေနဲ့ ကျွန်မအစ်မတို့အိမ်မှာဖြစ်ဖြစ်၊ သူငယ်ချင်းတစ်ယောက်ယောက်ရဲ့ အိမ်မှာဖြစ်ဖြစ် သွားဆော့နေတာလို့ ပြောလိုက်ရင် ရပါတယ်။ ဒါပေမယ့် ကျွန်မ လိမ်မပြောခဲ့ဘူး။ နတ်ပွဲသွားကြည့်တာလို့ပဲ အမှန်အတိုင်းပြောခဲ့တယ်။ ကျွန်မ မေမေမကြိုက်တာတွေကို လုပ်ခဲ့ပေမယ့်လည်း ဘယ်တုန်းကမှ လိမ်မပြောခဲ့ပါဘူး။ ဒါပေမယ့် တစ်ခါပါပဲ။ ကျွန်မ သိချင်တာ၊ စူးစမ်းချင်တာကို သိခွင့်ရပြီးရင်တော့ ကျွန်မက မေမေမကြိုက်တာကို နောက်တစ်ကြိမ် ဘယ်တော့မှ ထပ်မလုပ်ပါဘူး။

ကျွန်မက ကျွန်မ အပြစ်လုပ်မိလို့ အရိုက်ခံရရင်သာ မျက်ရည်မကျတာပါ။ တကယ်လို့ ကျွန်မမှာအပြစ်မရှိပဲ အရိုက်ခံရတယ်လို့ ထင်မိလို့ကတော့ အငိုမတိတ်တော့ပါဘူး။ ဆိုလိုချင်တာက တစ်ခါတစ်လေကျရင် ကျွန်မက ကိုကြီးနဲ့ ဖြစ်ဖြစ်၊ ညီမလေးနဲ့ ဖြစ်ဖြစ် တစ်ခုခုဖြစ်တယ် ဆိုပါတော့။ ကျွန်မမှာ အပြစ်မရှိဘူးလို့ ကျွန်မက ခံစားမိတယ်။ ဒါပေမယ့် မေမေက ကျွန်မမှာပါ အပြစ်ရှိတဲ့ ပုံစံနဲ့ ကျွန်မကို ဆူပြီးရိုက်တယ်ဆိုရင် ကျွန်မ အငိုမတိတ်တော့ဘူးသာ မှတ်ပေတော့။ ဘယ်အထိ ငိုကြောကရှည်နေသလဲ ဆိုရင် ဖေဖေရုံးက ပြန်လာတဲ့ အချိန်အထိပဲ။ မျက်ရည်တွေက ခြောက်နေပြီ။ ဒါပေမယ့် အသံက အိ...အိ....အိ....နဲ့ ငိုကြောကို ဆွဲဆန့်ထားတာလေ။

ဖေဖေပြန်လာတာကို မြင်တာနဲ့ ဖေဖေ့ဆီကို ပြေးပြီး ၀မ်းပန်းတနည်းနဲ့ တိုင်တော့တာပဲ။ ဖေဖေ့ခမျာမှာ ရုံးအိတ်လေး အသာချကာ အလုပ်ကပင်ပန်းလာတာတွေကို ဘေးချိတ်၊ ကျွန်မကို ကောက်ချီပြီး အငိုတိတ်အောင် ခေါက်တုံ့ခေါက်ပြန် လမ်းလျှောက်ပြီး ချော့ရတာလေ။ ကဲ .... ကြည့်ကြပါဦးနော်။ ကျွန်မဟာ ငယ်ငယ်တုန်းက ဘယ်လောက်များ ဆိုးလိုက်တဲ့ ကလေးလေးလဲလို့လေ။ ပြန်တွေးမိတိုင်းလည်း ကိုယ့်ကိုကိုယ် ခပ်နာနာသာ ရိုက်ပစ်ချင်မိတော့တာပါ။ နောက်တစ်ခါ အဲဒီလို ဆိုးဦးမလား ဆိုပြီးတော့လေ။

ဘာရယ်တော့ မဟုတ်ပါဘူး။ အသက်တစ်နှစ်ကြီးလာတာနဲ့ အမျှ ကိုယ့်ကိုကိုယ် ပြန်ပြီးဆင်ခြင်သုံးသပ်မိတော့ ငယ်ငယ်တုန်းက ဆိုးခဲ့တာတွေကို သွားသတိရမိလို့ပါ။ ဖေဖေ၊ မေမေတို့ကတော့ ကျွန်မကို ဆိုးတယ်လို့ ဘယ်တုန်းကမှ မပြောခဲ့ပါဘူး။ (လူပုံကြည့်တော့လည်း အဲဒီလိုမျိုး ဆိုးခဲ့လိမ့်မယ်လို့ ထင်မှ မထင်ရတာ :P)။ ဒါတွေက ခပ်ငယ်ငယ် သိပ်မသိတတ်ခင်တုန်းက ဆိုးခဲ့တာတွေပါ။ ကြီးလာခါမှ သိသိနဲ့ ဆိုးခဲ့တာတွေလည်း ရှိပါသေးတယ်။

အခုတော့ အသက်တွေ ကြီးလာတာနဲ့ အမျှ နောင်တတွေရလာတယ်။ ဖေဖေ၊ မေမေတို့ အပေါ်မှာ ဆိုးခဲ့မိသမျှတွေအတွက် တတ်နိုင်သမျှ ပြန်ပြီး ကျေးဇူးဆပ်ချင်တယ်။ ဘုရားရှိခိုးတဲ့ အခါတိုင်း ဆုတောင်းမိရင်လည်း “ဒီဘ၀မှာ မိဘတွေကို တတ်နိုင်သမျှ အကောင်းဆုံး ပြန်လည်ကျေးဇူးဆပ်ခွင့် ရသောသူ ဖြစ်ရပါလို၏ ” လို့ပဲ ဆုတောင်းမိတယ်။ အသက်တစ်နှစ်ကြီးကြီးလာတာနဲ့ အမျှလည်း ကိုယ့်ကိုကိုယ် တတ်နိုင်သမျှတော့ ပြန်လည် ဆင်ခြင်ပြီး လိမ္မာအောင် ကြိုးစားနေမိပါတယ်။ ခုတောင် ကျွန်မက တအားကို လိမ္မာနေပြီ။ ဆိုးကို မဆိုးတော့တာလို့ ထင်တာပဲ :)))။ (ကျွန်မနဲ့ အပြင်မှာ ခင်တဲ့သူတွေဆို ကျွန်မဘယ်လောက် လိမ္မာသလဲဆိုတာ သိတယ် :D)။

၁၃ ဂဏန်းကို တစ်ချို့တစ်ချို့သောသူတွေကတော့ မကြိုက်တတ်ကြပါဘူး။ ကျွန်မကတော့ ကျွန်မရဲ့ မေမေက အနှိုင်းမဲ့တဲ့ မေတ္တာတွေနဲ့ ကျွန်မကို မွေးဖွားပေးခဲ့တဲ့ ဒီ ၁၃ ရက်နေ့လေးကို အရမ်းမြတ်နိုးတယ်။ ဒီနှစ်မွေးနေ့လေးမှာ ကျွန်မအနေနဲ့ ဘာမှထူးထူးခြားခြား ကြီးကြီးကျယ်ကျယ်တော့ မလုပ်ဖြစ်ပါဘူး။ ကျွန်မကိုအရမ်းချစ်တဲ့ ကျွန်မရဲ့သူငယ်ချင်းနှစ်ယောက်က ချက်ပေးတဲ့ မုန့်ဟင်းခါးဆွမ်းနဲ့ အိမ်နားက ဘုန်းကြီးကျောင်းမှာ ရှိတဲ့ သံဃာတော်တွေကို အာရုဏ်ဆွမ်းသွားကပ်မယ်။ ဒီလောက်ပါပဲ။ မြန်မာပြည်မှာတော့ ဖေဖေ၊ မေမေတို့က ကျွန်မရဲ့ မွေးနေ့ကုသိုလ်အဖြစ် ကျွန်မတို့ပြည်မြို့မှာရှိတဲ့ မိဘမဲ့ ကလေးများဂေဟာမှာ ထမင်းကျွေးကြလိမ့်မယ်။

တကယ်လို့သာ ကျွန်မရဲ့ ဘလော့ဂါသူငယ်ချင်း မောင်နှမတွေအားလုံးနဲ့ အပြင်မှာ နီးနီးနားနားသာဆိုလို့ကတော့ ကျွန်မက တကယ့်ကို အစားအသောက်တွေမျိုးစုံနဲ့ မွေးနေ့ပွဲကြီးကို ပျော်ပျော်ပါးပါး စည်စည်ကားကားကြီး ကျင်းပပစ်ချင်တာပါ။ အခုတော့ မောင်နှမတွေက အဝေးတစ်နေရာစီမှာ တစ်ကွဲတစ်ပြား ဖြစ်နေတော့ကာ လုပ်ချင်ရက်နဲ့ လုပ်ခွင့် မသာဘူးပေါ့လေ ။ တကယ်ကို စိတ်မကောင်းပါဘူး။ ဘာမှ မကျွေးဖြစ်တဲ့ အတွက် ခွင့်လွှတ်ကြပါနော် :)))။ ဓါတ်ပုံထဲမှာပါတဲ့ ကိတ်မုန့်ကိုတော့ ကြိုက်သလောက်သာ စားသွားကြပါလို့။ တကယ်လို့ ကျွန်မရဲ့ မောင်နှမတွေ ဒီစာကို ဖတ်ပြီး အဲဒီ ကလေးဆိုးဆိုးလေးကို အမြင်ကတ်သွားကြတယ် ဆိုရင်လည်း မွေးနေ့လက်ဆောင်အနေနဲ့ တစ်ယောက်တစ်ချက်စီသာ ရိုက်သွားကြပါတော့လို့ :D။

(မှတ်ချက်။ ။ပုံလေးကတော့ ထုံးစံအတိုင်း Google ကနေ ရှာထားတာပါ။)

Sunday, June 6, 2010

အလွမ်းတွေမှားသောက်မိသောနေ့

မရည်ရွယ်ဘဲ
အတိတ်နယ်ထဲ ခြေချမိတော့
သတိရစိတ်တို့က
အုံးအုံးကျက်ကျက် ထဖြစ်ကုန်တယ်။ ။

ကယောင်ကတမ်းနဲ့
သီချင်းတစ်ပုဒ်ကို ထအဖွင့်
လွင့်လာတဲ့ အသံက
ရင်ကို တစ်ခါလာမှန်ပြန်တယ်။ ။

သတိရတဲ့အကြောင်း
ကပြောင်းကပြန်နဲ့
ကဗျာတစ်ပုဒ်ကို စပ်ဆိုတော့
ငါ့ဒိုင်ယာရီတွေ ငိုကုန်တာ
ကမ္ဘာကြီးတောင် စိုသွားတယ်။ ။

ဒယိမ်းဒယိုင်
ထောက်တိုင်ရှေ့မှာရပ်ရင်း
ကင်းဘတ်စ်စပေါ် စုတ်တံတင်
ကတုန်ကယင်နဲ့
စိတ္တဇပန်းချီတစ်ချပ်ကို အာရုံယူဆွဲပြန်တော့
ဒီပုံတူပဲ ထွက်လာပြန်တယ်။ ။

နင့်ဘက်က
အမုန်းကြေငြာ စာတမ်းတစ်ခုကို
ငါ့အတွက်ကတော့
အရှုံးတွေနဲ့ သေရာပါမှတ်တမ်းတစ်ခုလို ဖက်တွယ်ရင်း
မစဉ်းစားချင်တော့တဲ့ အတိတ်က ဇာတ်လမ်းတွေ
ဒီမှာလေ
တစ်ခန်းရပ်လိုက်ကြရအောင်။ ။

ထင်ချင်သလိုသာထင်
မြင်ချင်သလိုသာမြင်စေတော့
“ရှင်းပြခြင်း” ဆိုတဲ့ ဘာသာစကား
ငါမသင်ကြားချင်ဘူး
မတူညီတဲ့ ပုစ္ဆာတွေမှာ အဖြေတွေရှာဖို့ရာလည်း
ငါ့ဥာဏ်ရည်က မမှီခဲ့လေတော့
အချစ်တွေ အငွေ့ပျံချိန်
ရာသီခွင်တွေတောင် အရောင်မှိန်ခဲ့တာ
တော်တော်ကြာနေခဲ့ပြီ။ ။

(မှတ်ချက်။ ။ကဗျာတွေရေးပါဦးလို့ တိုက်တွန်းကြတဲ့ သူငယ်ချင်း မောင်နှမတွေ ရှိလို့ ချရေးလိုက်ပြန်တော့ ထုံးစံအတိုင်း ပျော်စရာ မဟုတ်ခဲ့ပြန်ဘူး။ :(( ဒါပေမယ့် ဘာပဲပြောပြော စာရေးရမှာ အရမ်းပျင်းနေတဲ့ ကျွန်မကို ကဗျာလေးတစ်ပုဒ် စပ်ဖြစ်ခဲ့စေတဲ့ အတွက် သူတို့ကို ကျေးဇူးတင်ပါတယ်။)

Friday, May 28, 2010

ခါချဉ်ကောင်မာန်မကြီး တောင်ကြီးမဖြိုတော့ပါ

“ဆရာမ.... ဆရာမ.... “မော်” ဆိုတဲ့ စာလုံးမှာပါတဲ့ (ရေးချရှေ့ထိုး) က ဒီလိုမျိုး -ာ်“ပေါ်” ဆိုတဲ့စာလုံးမှာပါတဲ့ (ရေးချရှေ့ထိုး) က ဒီလိုမျိုး -ါ် .... (ရေးချရှေ့ထိုး)ချင်း အတူတူ ဘာလို့ပုံစံနှစ်မျိုးဖြစ်နေတာလဲဟင်....။”

ဒါကတော့ တနင်္ဂနွေနေ့တွေတိုင်းမှာ လုပ်အားပေး အနေနဲ့ မြန်မာစာ သင်ပုန်းကြီးဖတ်စာ သွားသင်ပေးနေတဲ့ ဘုန်းကြီးကျောင်းက ကျွန်မရဲ့ တပည့်လေးတစ်ယောက်က ကျွန်မကို မေးလိုက်တဲ့ မေးခွန်းလေးပါ။ ကျွန်မအနေနဲ့ ပြန်လည်ဖြေဆိုဖို့ရာ အတော်ကို ဘေးကျပ်နံကျပ် ဖြစ်ခဲ့တဲ့ မေးခွန်းဆိုလည်း မမှားဘူးပေါ့။

အခုဒီဘုန်းကြီးကျောင်းက ကလေးတွေထဲမှာဆိုရင် အဖေ၊ အမေက မြန်မာတွေ ဖြစ်သော်ငြားလည်း အခြေအနေအရ ဒီနိုင်ငံမှာ မွေးဖွားကြီးပြင်းလာခဲ့ရပြီး မြန်မာစာကို ကောင်းစွာသင်ယူခွင့်မရတဲ့ ကလေးတွေ၊ မြန်မာပြည်မှာ မွေးဖွားခဲ့ပေမယ့်လည်း မိဘတွေရဲ့ အလုပ်အကိုင် အခြေအနေတွေအရ ဒီနိုင်ငံကို ပြောင်းရွှေ့ ကြီးပြင်းလာခဲ့ရပြီး မြန်မာစာကို မေ့သွားကြတဲ့ ကလေးတွေ စသည်ဖြင့်ပေါ့လေ အမျိုးမျိုး ရှိကြပါတယ်။


ကျွန်မ အဲဒီဘုန်းကြီးကျောင်းက စာသင်ခန်းလေးကို ပထမဆုံးအနေနဲ့ စရောက်သွားတဲ့နေ့မှာပဲ သတိထားလိုက်မိတာတစ်ခုက တစ်ချို့ကလေးတွေဟာ Singlish ကိုတော့ မွှတ်နေအောင် ပြောတတ်ကြပြီး မြန်မာစာ၊ မြန်မာစကားကို အဆင်ပြေပြေ၊ အချိုးကျကျ ပြောတတ်ဖို့ရာကျတော့ မနည်းကို အားယူပြောဆိုနေကြရတာကိုပါပဲ။

အဲဒီမှာတင်ပဲ ကျွန်မစိတ်ထဲမှာ သူတို့လေးတွေကို မြန်မာစာနဲ့ ရေးထားတဲ့ စာပေတွေကို ကျွမ်းကျွမ်းကျင်ကျင် သိစေချင်၊ ဖတ်တတ်စေချင်တဲ့စိတ်တွေ တဖွားဖွားဖြစ်ပေါ်လာမိပါတယ်။ အခြေအနေတွေက ဘယ်လိုတွေပဲ ဖြစ်နေဖြစ်နေပေါ့နော်။ မြန်မာကလေးငယ်လေးတွေကို မြန်မာပြည်အကြောင်းကို သိစေချင်တယ်။ မြန်မာ့ဓလေ့ထုံးစံတွေကို နားလည်စေချင်တယ်။ မြန်မာ့မြေ မြန်မာ့ရေကို ချစ်တတ်စေချင်လာတယ်။


ဒါ့အပြင် ကျွန်မဆက်တွေးမိတာတွေက ဒီကလေးလေးတွေ စိတ်ဝင်စားနေကြတဲ့ စာအုပ်စာပေ၊ ကာတွန်းဇာတ်ကောင်တွေ အကြောင်း။ အခုဆိုရင် သူတို့အနေနဲ့ ကောင်းကောင်းသိတာက စပိုက်ဒါမန်း (Spiderman)၊ ဘက်တ်မန်း (Batman)၊ တွမ်နဲ့ ဂျယ်ရီ (Tom & Jerry)၊ တွိတီ (Tweety)၊ ဂါးဖီးလ်(Garfield)၊ ဖန်တန် (The Phantom)Donald Duck စသည် စသည်တို့ပေါ့လေ။ ကျွန်မက သူ့တို့ကို သူတို့အခုသိနေတဲ့ ဇာတ်ကောင်တွေတင်မကဘူး၊ သိပ်ချစ်စရာကောင်းတဲ့ မြန်မာ့ကလေးကာတွန်း ဇာတ်ကောင်လေးတွေရှိတယ် ဆိုတဲ့အကြောင်းကိုပါ သိစေချင်တာ။

ကျွန်မတို့ ငယ်ငယ်တုန်းက အရမ်းကို နှစ်သက်စွဲလမ်းခဲ့တဲ့ ရွှေသွေးမိုးသောက်ပန်းတေဇ အစရှိတဲ့ ကလေးဂျာနယ် စာစောင်တွေထဲက ကျွန်မ အခုထိမမေ့သေးတဲ့ ကာတွန်း ဇာတ်လိုက်လေးတွေဖြစ်တဲ့ နုံအအ ထုံပေပေနိုင်လွန်းတဲ့ “ကျော်ထွဏ်း”ရဲ့ ၀တုတ်တုတ် ဇာတ်လိုက် “မောင်ရိုး”နဲ့ “စမ်းချောင်းကိုကိုအောင်”ရဲ့ ပိန်ညောင်ညောင် ဇာတ်လိုက် “မောင်န”တို့၊ “သူရ”ရဲ့ “ဘယ်ကျော်”နဲ့ “မင်းဇော်”ရဲ့ လျှာထိုးဦးထုပ်လေး ဆောင်းထားတဲ့ “ဘိုဘို”တို့၊ “မြေဇာ”ရဲ့ ခေါင်းပေါ်မှာ ဆံပင်မွှေးလေး တစ်ပင်တည်း ထောင်နေတဲ့ “စိန်မျောက်မျောက်”၊ အမြဲတမ်း စွပ်ကျယ်အင်္ကျီကို ပုခုံးတစ်ဖက်ကျအောင် ၀တ်ထားတတ်ကြပြီး မျက်မှန် လေးထောင့်ထူထူကြီးတွေကို တပ်ထားကြတဲ့ “တင်အောင်နီ”ရဲ့ “ပြာဂလောင်နဲ့ ပြာလချောင်”ညီအစ်ကိုတို့၊ “ဆွေမင်း(ဓနုဖြူ)”ရဲ့ “တွတ်ပီနဲ့ဗိုက်ကလေး”တို့ အဲဒီဇာတ်ကောင်တွေကိုရော သူတို့လေးတွေနဲ့ ရင်းနှီးစေချင်လိုက်တာ။

ဒါတင်မဟုတ်သေးပါဘူး။ ဒီလိုနဲ့ သူတို့လေးတွေ တစတစ ကြီးပြင်းလာပြီဆိုိရင်ရော။ မြန်မာ့သမိုင်းဆိုတာကိုရော သူတို့ စိတ်ဝင်တစားရှိပါ့လား။ မြန်မာနိုင်ငံတော်ကြီးကို ဘယ်သူတွေက ဘယ်လို သွေးတွေ ချွေးတွေနဲ့ တည်ထောင်ခဲ့ရသလဲ ဆိုတာမျိုးကိုပေါ့။ ပထမမြန်မာနိုင်ငံတော်ကြီးကို စတင်တည်ထောင်ခဲ့သူ “အနော်ရထာမင်းတရားကြီး”၊ ဒုတိယနိုင်ငံတော်ကို တည်ထောင်သူ “ဘုရင့်နောင်”၊ တတိယနိုင်ငံကို တည်ထောင်သူ “အလောင်းမင်းတရားကြီး ဦးအောင်ဇေယျ” စသူတို့အပြင် နောက်ဆုံး ကျွန်မတို့ တိုင်းပြည်အတွက် အသက်စွန့်သွားခဲ့တဲ့ ကျွန်မတို့ သိပ်ကို ကြည်ညိုလေးစားရတဲ့ အာဇာနည် ခေါင်းဆောင်ကြီး “ဗိုလ်ချုပ်အောင်ဆန်း”။ ဒီသူတွေအကြောင်းကို သိဖို့နေနေသာသာ ဒီနာမည်တွေကို သူတို့ ကြားတောင်မှ ကြားဖူးကြရဲ့လား။ သူတို့ရဲ့ မိဘတွေကရော ကလေးတွေကို မြန်မာ့သမိုင်းကြောင်းတွေကို တခုတ်တရ ပြောပြကြဖို့ သတိရပါ့မလား။

သမိုင်းဆိုတာက အလှမ်းဝေးပါသေးတယ်လေ။ စာပေတွေနဲ့ ပတ်သက်လို့ စဉ်းစားကြည့်ရင်ရော။ သူတို့လေးတွေ အနေနဲ့ ကဗျာ၊ ပြဇာတ်၊ ၀တ္ထုဇာတ်လမ်းစတဲ့ အပြင်စာပေတွေကို ဖတ်ရှုတတ်လာကြပြီဆိုရင် ရာဘင်တရာ နတ်တဂိုး (Rabindranath Tagore)၊ ရှိတ်စပီးယား (Shakespeare)၊ မတ်တွိန်း (Mark Twain)၊ အော်စကာဝိုင်း (Oscar Wilde)၊ လီယိုတော်စတွိုင်း (
Leo Tolstoy)၊ ဗာဂျီးနီးယားဝုဖ် (Virginia Woolf)၊ ဂျွန်ရပ်စကင်း (John Ruskin) စတဲ့ ကမ္ဘာကျော် စာရေးဆရာ၊ ဆရာမကြီးတွေရဲ့ စာတွေ၊ ကဗျာတွေကိုပဲ ဖတ်ကြတော့မှာလား။ အဲဒီစာရေးဆရာကြီးတွေရဲ့ အကြောင်းတွေကိုပဲ စိတ်ဝင်တစား လေ့လာကြမှာလား။


ကျွန်မတို့ မြန်မာပြည်မှာ ဟိုးရှေးမဆွကတည်းက ပေါ်ပေါက်ခဲ့ကြတဲ့ “ရှင်မဟာရဋ္ဌသာရ”“ရှင်မဟာသီလ၀ံသ”“ရှင်ဥတ္တမကျော်”“စလေဦးပုည” စသူတို့လို က၀ိအကျော်အမော်တွေရဲ့ စာပေတွေက စလို့ “ဆရာကြီးသခင်ကိုယ်တော်မှိုင်း”ရဲ့ ဒွေးချိုး၊ လေးချိုးကြီးတွေအပါအ၀င်၊ ခေတ်စမ်းစာပေမှာ အဦးဆုံးလို့ ပြောလို့ရတဲ့ “သိပ္ပံမောင်ဝ”ရဲ့ စာပေတွေအပြင် နောက်ပိုင်းမှာ ဆက်တိုက်ဆိုသလို ထူးချွန်ပြောင်မြောက်တဲ့ စာရေးဆရာကြီးများဖြစ်တဲ့ “မြသန်းတင့်”“ဒဂုန်ရွှေမျှား”“ရွှေဥဒေါင်း”“ချစ်ဦးညို”“တက္ကသိုလ်ဘုန်းနိုင်”၊ စာရေးဆရာမတွေထဲက ဆိုရင်လည်း “ဂျာနယ်ကျော်မမလေး”“ခင်နှင်းယု”“ခင်ဆွေဦး”“ကြည်အေး”“ဂျူး” စသည်ဖြင့်ပေါ့လေ။ ထိုမြန်မာစာရေးဆရာ၊ ဆရာမကြီးတွေရဲ့ စာပေတွေကိုရော သူတို့တွေ တပုဒ်ဖြစ်စေ၊ တစ်အုပ်ဖြစ်စေသော်မှ မြည်းစမ်းကြည့်ဖြစ်ကြပါ့မလား။ သိပ်ကိုမြန်မာဆန်ပြီး သိပ်ချစ်စရာကောင်းတဲ့ “ဇော်ဂျီ”“မင်းသုဝဏ်”“တင်မိုး”“နုယဉ်”“ငွေတာရီ”တို့ရဲ့ ကဗျာတွေကိုရော တစ်ကြောင်းဖြစ်စေ၊ တစ်ပိုဒ်ဖြစ်စေ သူတို့ ရွတ်ဆိုကြည့်ကြပါ့မလား။


အဲဒီလို အဲဒီလိုနဲ့ ကျွန်မဟာ အတွေးတွေ နယ်ချဲ့ပြီး ပူပင်သောက စိုးရိမ်ဗျာပါဒတွေ ကြီးစွာနဲ့ စဉ်းစားတွေးတောပြီးသကာလမှာ ဆုံးဖြတ်ချက်တစ်ခုကို ချလိုက်ပါတယ်။ “ဟုတ်ပြီ… သူတို့လေးတွေ မြန်မာပြည်၊ မြန်မာ့မြေ၊ မြန်မာ့ရေ၊ မြန်မာ့စာပေကို ချစ်မြတ်နိုးတတ်၊ စိတ်ဝင်စားတတ်လာအောင် ဒီလိုလုပ်ပေးခွင့်လေးရနေတုန်းမှာ ငါလုပ်ပေးနိုင်သရွေ့လေး ကိုယ်စွမ်းဥာဏ်စွမ်း ရှိသလောက် အားထုတ်ပြီး သူတို့ကို စည်းရုံးရမယ်” ဆိုပြီး ခါချဉ်ကောင်မာန်ကြီး တောင်ကြီးဖြိုမယ့်ဟန်နဲ့ အားကြိုးမာန်တက်နဲ့ သင်ကြားရေးကို စတင်လိုက်တဲ့ကျွန်မဟာ အပေါ်ကမေးခွန်းမျိုးလောက်နဲ့တင် ချွေးပြန်သွားခဲ့ပါတယ်။ မြန်မာစာဆိုတာ စိတ်ဝင်စားစရာကောင်းလှသလို သင်ယူဖို့ခက်ခဲနက်နဲတဲ့ စာလို့လဲ ခံစားမိလာပါတယ်။ တဆက်တည်းမှာပဲ ကိုယ့်ကို ကကြီး၊ ခခွေး ၀ိုင်းအောင်ရေးတတ်ဖို့ သင်ပေးခဲ့တဲ့ ငယ်ငယ်တုန်းကဆရာ၊ ဆရာမတွေကိုလည်း သတိတရ ကျေးဇူးတင်လိုက်မိပါရဲ့။


တကယ်တော့ ကျွန်မဆိုတာက ဒီနိုင်ငံမှာ အလုပ်လုပ်နေတုန်းအချိန်မှာ ကျွန်မရထားတဲ့ ကိုယ်ပိုင်အချိန်လေးဖြစ်တဲ့ စနေ၊ တနင်္ဂနွေရုံးပိတ်ရက် (၂)ရက်ထဲကနေ အချိန်လေး နဲနဲဖဲ့ပြီး ပရဟိတ အလုပ်လေး တစ်ခုခု လုပ်ပေးချင်တဲ့ စိတ်ကြောင့်ရယ်၊ ကလေးတွေကို ချစ်တာ၊ ကလေးတွေကို စာသင်ပေးရတာကို ၀ါသနာပါတာက တစ်ကြောင်းရယ်ကြောင့်သာ လုပ်အားပေးဆရာမအဖြစ် ၀င်လုပ်ခဲ့တဲ့သူလေ။ ပြီးတော့ ကျွန်မတို့တွေတုန်းက မြန်မာစာကိုလည်း (၁၀)တန်း အထိပဲ သင်ယူခဲ့ရတာ ဆိုတော့ နောက်ပိုင်းမှာလည်း မြန်မာစာနဲ့ ပတ်သက်လို့ နှိုက်နှိုက်ချွတ်ချွတ် ထဲထဲဝင်ဝင် နက်နက်နဲနဲ ဆက်မလေ့လာဖြစ်ခဲ့ဘူးပဲ ဆိုပါတော့။ အဲဒီမှာပဲ ကလေးတွေကို သင်ပုန်းကြီးဖတ်စာ သင်ပေးဖို့ကြိုးစားတဲ့အခါ အဲဒီလိုအခက်အခဲတွေနဲ့ စတွေ့တာပါပဲ။ ကျွန်မကြုံတွေ့ရတာက အပေါ်ကမေးခွန်းတင်ပဲလားဆိုတော့ မဟုတ်သေးဘူး။ ရှိသေးတယ်။


တစ်ခါပေါ့….. “ကြွ” ဆိုတဲ့ စာလုံးကို သင်တဲ့အခါ ကျွန်မက အဲဒီ “ကြွ” ဆိုတဲ့ စကားလုံးက ဘုရား၊ ရဟန်း သံဃာ အစရှိတဲ့သူတွေအတွက် သုံးတဲ့စကားလုံး ဖြစ်ကြောင်း၊ ဥပမာဆိုရင်……ဘုရားရှင် လာတယ်လို့ မသုံးဘူး…“မြတ်စွာဘုရား ကြွလာတယ်…” “ဆရာတော်ကြီးတွေ၊ ဘုန်းဘုန်းကြီးတွေ ကြွလာတယ်….” အဲဒီလို စာကြောင်းမျိုးတွေမှာဆိုရင် ဒီ “ကြွ” ကို သုံးရတယ် လို့ ရှင်းပြထားမိပါတယ်။ ဒီလိုနဲ့


မြွေသံလား လေသံလား။

မြွေ သတိထားပါ။

မြွေထိက ဆေးခန်း သွားရမည်။

ဆရာဝန် ကြွလာပြီ။


ဆိုတဲ့ ဖတ်စာလည်း ရောက်ရော


ကျွန်မတပည့် ကလေးလေးက

“ဆရာမ…ဆရာမ ပြောတော့ ကြွကို ဘုရားတို့၊ ဘုန်းဘုန်းကြီးတို့ အတွက်ပဲ သုံးတာဆို…အခု ဘာလို့ ဆရာဝန်ကို ကြွလာပြီလို့ သုံးတာလဲ…” တဲ့လေ။ ကျွန်မ ငယ်ငယ်တုန်းက သူတို့လို စဉ်းစားမိရဲ့လားလို့ တွေးကြည့်မိတယ်။ ဆရာမက ဒါဆို ဒါပဲလို့ မှတ်လိုက်တာ များသလားလို့လေ။


သူတို့လေးတွေရဲ့ ကြံကြံဖန်ဖန်စဉ်းစားတတ်တဲ့ ဥာဏ်ရည်လေးတွေကိုတော့ ကျွန်မ မချီးကျူးပဲ မနေနိုင်ပါဘူး။ တစ်ခါကဆိုရင်လည်း


မိဘဆရာ ရိုသေပါ။

ရိုးရိုးသားသား နေပါ။

သာသာယာယာ စကားဆိုပါ။

အဘိုးအိုကို ကန်တော့ပါ။


ဆိုတဲ့ ဖတ်စာမှာ


“ဆရာမ…. ကန်တော့ ဆိုတဲ့ စကားလုံးမှာ တော့ဆိုတာပါလို့ တော်သေးတယ်နော်…. တကယ်လို့ တော့ဆိုတဲ့ စကားလုံးသာ မပါရင် အဘိုးအိုကို ကန်ပါ လို့ ဖြစ်သွားမှာပေါ့နော်….” တဲ့။


အဲဒီလို ပေါက်ပေါက်ရှာရှာလေးတွေကလည်း တွေးတတ်သေးတာပါ။ တစ်နေ့ တစ်နေ့ ဆရာမတွေခမျာမှာလည်း သင်ခန်းစာတွေထဲက အကြောင်းအရာတွေကို သူတို့မျက်စိထဲမှာ ပုံပေါ်လာအောင် သူတို့နားလည်အောင် ဥပမာ၊ ဥပမေယျတွေနဲ့ ရှင်းရတာလည်း လွယ်တော့မလွယ်လှပါဘူး။ သူတို့စိတ်ဝင်စားအောင် ပြောပုံဆိုပုံ ဟန်ပန်မူရာကလည်း လိုသေးတယ်ထင်ပ။ ကျွန်မဆိုရင် ဘယ်လောက်အထိ အပြောအဟော စည်းရုံအားကောင်းသလဲဆိုတာ နမူနာ တစ်ခု ပြောပြရရင်


မိုးလရာသီ

အဘိုးအိုတို့လယ်တဲ

တဲကလေး မိုးယို နေသလား။

ကူညီ၍ မိုးပေးပါ။

ဆိုတဲ့ ဖတ်စာကို သင်တော့ “ဆရာမ မိုးယိုတယ်ဆိုတာ ဘာလဲ” တဲ့။ ကျွန်မကလည်း ဒီလိုစိတ်ဝင်တစားမေးလာတဲ့အခါ အဖြေကို ပေးဖို့ အားကြိုးမာန်တက်နဲ့ပေါ့


“သမီးလေးရေ မိုးယိုတယ်ဆိုတာ တဲပေါ်က မိုးထားတဲ့အမိုးက မလုံပဲ ပေါက်ပြဲနေတဲ့ အတွက် မိုးရေတွေက အဲဒီအပေါက်အပြဲတွေကတဆင့် ယိုကျတာကို ခေါ်တာလေ။ ဘာလို့ အမိုးတွေက ပေါက်ပြဲရတာလဲဆိုတော့ ဒီတဲလေးရဲ့ အမိုးက ကွန်ကရစ်တွေနဲ့ ဆောက်လုပ်ထားတာမျိုး မဟုတ်ဘူးလေ။ ယာထဲမှာ ခဏနေဖို့အတွက် သက်ကယ်ပျစ်တွေနဲ့မိုးထားတာ။ သက်ကယ်ဆိုတာက ဘယ်ကရတာ…ဘယ်လို ပုံစံရှိတာ.....” စသည်ဖြင့်ပေါ့လေ… ဟန်အပြည့် မာန်အပြည့်နဲ့ ရှင်းပြလိုက်တာပေါ့။


ကလေးကလည်း ကျွန်မကို ပြူးပြူးလေးနဲ့ ငြိမ်ပြီး စိုက်ကြည့်နေတာဆိုတော ကျွန်မကလည်း ငါတော့ ဟန်ကျပြီပေါ့ ကလေးက ငါပြောတာကို စ်ိတ်ဝင်တစားနားထောင်နေရှာသား ဆိုပြီး ပီတိတွေဖြစ်မယ်ကြံရုံ ရှိသေး ကျွန်မ စကားမဆုံးခင်မှာပဲ ကလေးက ပြောချလိုက်တာက “ဆရာမ ဆရာမ ပြီးခဲ့တဲ့ တစ်ပတ်ကလေ သမီးမေမေ i-phone ၀ယ်လိုက်တယ် သိလား…” တဲ့လေ။ “သြော်….အေးအေး….” ကျွန်မမှာ ရှေ့ဆက်ပြီးတော့ပဲ ရှင်းပြရတော့မလို ရပ်လိုက်ရတော့မလိုနဲ့လေ။


ဒီလိုနဲ့ တစတစဆိုသလို ကျွန်မရဲ့ တောင်ကြီးဖြိုမယ့် မာန်တွေလည်း တဖြည်းဖြည်း တဖြည်းဖြည်းနဲ့ လျော့ကျကုန်ရပြီး ကဲပါလေ…. ဘာမှမတတ်တာ၊ မသိတာထက်စာရင် ကကြီးကနေ အအထိပဲ တတ်ဦးတော့၊ ဘယ်လိုအခက်အခဲတွေပဲ ကြုံတွေရစေဦး အနဲဆုံး သင်ပုန်းကြီးဖတ်စာလောက်ကိုပဲ သူတို့လေးတွေ ကျေကျေညက်ညက် ဖတ်တတ်အောင် သင်ပေးနိုင်ပြီဆိုရင်ကိုပဲ တော်လှပါပြီလေ ဆိုပြီး ကျွန်မရဲ့ ရှိသမျှမာန်တွေကို လျှော့ချလိုက်ရပါလေတော့တယ်။

Wednesday, May 12, 2010

ရှက်ကိုယ်တွေ့


ကျွန်မတို့ နည်းပညာတက္ကသိုလ်မှာ ကျောင်းတက်ခဲ့စဉ် ကာလတွေတုန်းကပေါ့...။ သိကြတဲ့အတိုင်း နည်းပညာ တက္ကသိုလ်ဆိုတာမျိုးက အလွန်အင်မတန်မှ သွားရေးလာရေး အဆင်ပြေ လွယ်ကူချောမွေ့တဲ့၊ သာယာလှပတဲ့ မြို့ပြင်က လယ်ကွင်းပြင်လို နေရာမျိုးတွေမှာ ထုတ်ပြီး တည်ဆောက်တတ်ကြတာ ဆိုတော့ကာ ကျွန်မတို့ရဲ့ ပြည်နည်းပညာတက္ကသိုလ်ကြီးကလည်း ပြည်မြို့ကနေ ရှစ်မိုင်အကွာမှာ ရှိတဲ့ လက်ခုပ်ပင်ရွာနဲ့ နှောကုန်းရွာ အနီးမှာ တည်ရှိထားပါတယ်။

ဒါပေမယ့် ကျွန်မတို့ကျောင်းသားတွေ နံနက်ပိုင်း အဲဒီကျောင်းတော်ကြီးကို ကျောင်းချိန်အမီသွားရောက်နိုင်ဖို့၊ စာသင်ပြီးလို့ ကျောင်းကအဆင်း အိမ်ကိုပြန်လာဖို့ ဆိုတဲ့ အရေးတွေမှာကျတော့ “မထသ” ကနေ ကျောင်းသားတွေအတွက် ဆိုပြီး တာဝန်ယူ စီစဉ်ပေးတဲ့ ဖယ်ရီကားတွေက တကယ်တမ်းမှာ လုံလောက်မှု မရှိပါဘူး။ (အဲဒီအချိန်တုန်းက ပြောတာပါ...အခုတော့ လုံလောက်မှုရှိမရှိ ကြုံမှ မေးကြည့်ရဦးမယ်)။ အဲဒီတော့ ကျောင်းသားတွေခမျာမှာ ဖယ်ရီကိုချည်း အားကိုးနေလို့ မရတော့ဘဲ ပြည်မြို့ကနေ “ပေါင်းတလည်” “ပေါက်ခေါင်း” အစရှိတဲ့ မြို့တွေကို ပြေးဆွဲနေတဲ့ လိုင်းကားတွေ(ပုံမှာမြင်ရတဲ့ ကားမျိုး)ကိုလည်း အားကိုးအားထား ပြုရပါတယ်။

ပေါင်းတလည် နဲ့ ပေါက်ခေါင်းဆိုတာက ပြည်နည်းပညာ တက္ကသိုလ်ကို ကျော်ပြီးမှ ရောက်တဲ့ မြို့တွေလေ...။ ဆိုလိုချင်တာက ကျွန်မတို့ကျောင်းက အဲဒီမြို့တွေကို သွားတဲ့ ကားလမ်းဘေး လမ်းခုလတ်မှာ တည်ရှိတယ်ပဲ ဆိုပါတော့...။ လိုင်းကားတွေက ပြည်မြို့က အထွက်ဆိုရင်တော့ နာရီခြားနဲ့ အလှည့်ကျ ထွက်ကြရတာဆိုတော့ ကိုယ်က စောစောသာ နေရာသွားယူလိုက်မယ်ဆိုရင် သိပ်ဒုက္ခမရောက်ပဲ နေရာရတတ်ပေမယ့် အပြန်ချိန်တွေမှာတော့ အမြဲလိုလို အခက်ကြုံရတတ်ပါတယ်။

စာသင်ချိန်တွေ ဆိုတာကလည်း နေကုန်အောင် တက်ရတတ်တာမျိုး မဟုတ်လေတော့ အတန်းပြီးရင် ပြီးတာနဲ့ တပြိုင်နက် ပြည်တော် ပြန်ဖို့အရေး ကျွန်မတို့မှာ ကျောင်းရှေ့လေးကိုထွက် လမ်းဘေးလေးတွေမှာ တန်းစီပြီး ကားစမျှော်ရပါတယ်။ ဖယ်ရီတွေက ကျတော့ ပြည်ကနေ ညနေပုံမှန်ကျောင်းဆင်းချိန်မှ လွှတ်ပေးတာဆိုတော့ ကြားထဲက ကို့လို့ကန့်လန့် အချိန်တွေမှာကျတော့ လိုင်းကားကိုပဲ အားကိုးစရာ ရှိတာလေ။

တစ်ခါတစ်လေကျတော့လည်း ကိုယ်ပိုင်ကားလေးတွေ ဖြတ်သွားတဲ့အခါ တစ်ချို့ကကျတော့ စိတ်ကောင်းရှိစွာနဲ့ ကျောင်းရှေ့မှာရပ်ပြီး ကျောင်းသူကျောင်းသားတွေကို နိုင်သလောက် ခေါ်တင်ပေးသွားတတ်ပါတယ်။ တစ်ချို့ကကျတော့လည်း လမ်းဘေးမှာ အဖြူနဲ့နက်ပြာဝတ်စုံလေးတွေ ၀တ်ပြီး ခေါ်များခေါ်ချင်မလားလေရယ်လို့ သနားစရာ မျက်နှာပေးလေးတွေနဲ့ တန်းစီပြီး ကြည့်နေတဲ့ ကျောင်းသူ ကျောင်းသားလေးတွေကို “ဟုတ်ကဲ့ သနားပါတယ်” ဆိုတဲ့ အကြည့်လေးနဲ့ပဲ ကြည့်သွားတတ်ကြပါတယ်။

အခုနလိုင်းကားအကြောင်းကို ဆက်ပြောရမယ်ဆိုရင် အဲဒီ လိုင်းကားတွေမှာက အပေါ်က ဓါတ်ပုံထဲမှာ မြင်ရတဲ့အတိုင်း လက်ဝဲ လက်ယာ တစ်ဘက်စီကပ်လျက် ဘေးခုံတွေပါပြီး အလယ်မှာကကျတော့ အလယ်ခုံဆိုပြီး ခုံတန်းအရှည်ကြီးတွေကို အလျားလိုက် တစ်တန်းတည်း ချထားပါတယ်။ အဲဒီတော့ ဘေးခုံရတဲ့သူကတော့ ကိုယ်ရတဲ့နေရာလေးမှာ အရှေ့ဘက်လေးမျက်နှာမူ အိနြေ္ဒရရလေး ထိုင်လိုက်သွားရုံပဲပေါ့...။ အလယ်ခုံမှာထိုင်တဲ့သူကျတော့ ခန္ဓာကိုယ်ကို နှစ်ဘက်လှည့်ပြီး ထိုင်လို့ရပါတယ်..။ ဘယ်ဘက်ကိုလှည့်မလား...ညာဖက်ကိုလှည့်မလား... အဆင်ပြေသလိုပေါ့...။

တစ်ခါတစ်ရံမှာ ကားသမားတွေက အဲဒီအလယ်ခုံတွေကို ဖယ်ထုတ်လိုက်ပြီး ကြားထဲမှာ ဆန်အိတ်တို့ ကြံသကာအိတ်တို့ တပြည့်တင်တတ်ပါသေးတယ်...။ အဲဒါဆိုရင်တော့ အဲဒီဆန်အိတ်တွေ ကြံသကာအိတ်တွေပေါ်မှာပဲ ထိုင်ချ ရတာပေါ့နော်...။ ဘယ်တတ်နိုင်ပါ့မလဲ..။ အဲဒီလိုအခါမျိုးဆိုရင်တော့ ထမီနက်ပြာတွေလည်း နက်မပြာနိုင်တော့ပဲ နက်ဖြူတူတူတွေ ဖြစ်ကုန်တတ်ပါတယ်။ ဒါပေမယ့် လည်း ဘယ်တတ်နိုင်မလဲလေ...။ ကားရတဲ့အချိန် ရတဲ့ကားကိုပဲ အဆင်ပြေသလို ၀င်ထိုင်လိုက်ရတာပါပဲ..။

ကျွန်မတို့ တွေရဲ့ အကျင့်ကလည်း သူငယ်ချင်းတွေနဲ့ အတူတူထိုင်ရမှ စိတ်ချမ်းသာတတ်တာမျိုး မဟုတ်လား...။ သူငယ်ချင်းနဲ့ အတူတူ ယှဉ်လျက် ဘေးခုံ သို့မဟုတ် အလယ်ခုံမှာ ရရင်တော့ ပျော်စရာပေါ့...။ စကားတွေ ရေပက်မ၀င်အောင် တွတ်ထိုးလို့ရပြီလေ...။ အတန်းထဲမှာ ဘယ်ဆရာ၊ ဘယ်ဆရာမက ဘယ်လို ဘယ်ကျောင်းသား၊ ကျောင်းသူကဖြင့် ဘယ်လို...ဘယ်ဘာသာရပ်က ဘယ်လို စသည်ဖြင့် စသည်ဖြင့်ပေါ့လေ...ပြောလိုက်ကြ ရီစရာရှိလည်း ရီလိုက်ကြနဲ့ အင်း...ပြောရမယ်ဆိုရင် ကျောင်းတက်စားရတဲ့ ဘ၀က အတော်တော့ ပျော်စရာကောင်းသား..။ (အခုလို ပင်ပင်ပန်းပန်း အလုပ်လုပ်စရာမလိုပဲ မိဘဆီက လက်ဖြန့်တောင်းသုံးရုံပဲ ဆိုတော့ ပျော်စရာကောင်းတာပေါ့...)။

ဒီလိုနဲ့ တစ်ရက်... ထုံးစံအတိုင်းပေါ့... ကျွန်မတို့ သူငယ်ချင်းတစ်သိုက် ကျောင်းကပြန်တဲ့အချိန် ကားစောင့်နေတုန်း လိုင်းကားတစ်စီး ရောက်အလာ ၀ရုန်းသုန်းကားနဲ့ အလုအယက် တက်လိုက်ကြပြီး ကားပေါ်မှာ ရရာနေရာကို အဆင်ပြေသလို ၀င်ထိုင်ကြရော ပြောပါတော့...။ အဲဒီမှာ ဘေးခုံနှစ်ခုံက လူတွေအပြည့်ဆိုတော့ကာ ကျွန်မတို့တွေက အလယ်ခုံမှာပဲ နေရာရပါတော့တယ်...။ အပြန်ဆိုရင် များသောအားဖြင့် ပါလာတတ်တဲ့ ခရီးသည်တွေက အဲဒီလမ်းတလျှောက်မှာရှိတဲ့ ရွာတွေက တက်လာကြတဲ့ ရွာသူရွာသားတွေက များပါတယ်...။ ဖြစ်ချင်တော့ ကျွန်မသူငယ်ချင်းတွေနဲ့ ကျွန်မနဲ့က အလယ်ခုံမှာကိုပဲ ထိုင်တဲ့ ဘက်က မတူဘူး ဖြစ်သွားတယ် ...။ ကျွန်မ တစ်ယောက်တည်းက ညာဖက်ခုံတန်းဘက်ကို မျက်နှာမူလို့...။ ကျွန်မရဲ့ သူငယ်ချင်းတွေက ဘယ်ဘက်ခုံတန်းဘက်ကို မျက်နှာမူလို့...။ ရှိစေတော့...။ ဒီလိုပဲ အဆင်ပြေသလိုပဲ စီးရမှာပေါ့...။

ဒါပေမယ့် အဆင်မပြေတာက စဖြစ်လာပါပြီ...။ ကျွန်မရဲ့ရှေ့တည့်တည့်မှာ ထိုင်နေတာက ကျောင်းမတိုင်ခင် ရွာတစ်ရွာကနေ ထင်ပါရဲ့ .... ပါလာတဲ့ သကောင့်သားတစ်ကောင်...။ ၀တ်လာတဲ့ ပုဆိုးကလည်း အခုမှ အသစ်ကို ထုတ်ဝတ်လာတာ ထင်ပ.. ပိပိရိရိမရှိပဲ ဖောင်းဖောင်းပွပွနဲ့..။ မောင်မင်းကြီးသားက သူ့ရှေ့တည့်တည့်မှာ ကောင်မလေး လာထိုင်ပြီလည်းဆိုရော ရသမျှ အခွင့်အရေးကို လက်လွတ်မခံပဲ အပီကို စရှိုးတော့တာပါပဲ...။

ဒါဟာ မိန်းခလေးများထက် သာလွန်သော ယောက်ျားလေးများရဲ့မွေးရာပါ မဟာအခွင့်အရေး ဆိုတော့ကာ ကျွန်မက “ဟဲ့ နင်ငါ့ကို မကြည့်နဲ့ မျက်လုံးကိုမှိတ်ထား....” လို့ ဘယ်လိုလုပ်ပြီး တားလို့ရပါ့မလဲ...။ သူနဲ့ ကျွန်မနဲ့ကြားထဲမှာကလည်း ၂ပေသာသာလောက်ပဲ ခြားတာဆိုတော့ စဉ်းစာသာကြည့်တော့ ...။ ကျွန်မမှာ တလမ်းလုံး စိတ်တွေကျဉ်းကျပ် စိတ်ကလည်းတိုပေါ့ ...။ မျက်နှာထားကို တင်းထားလိုက်ရတာလည်း မျက်နှာမှာ ရှိသမျှအကြောတွေ ပြတ်ထွက်ကုန်မှာတောင် စိုးရတယ်...။

ဒီလိုနဲ့ကျွန်မမှာလည်း ကျွန်မမျက်နှာရဲ့ direction ကို သူနဲ့ တည့်တည့် မဆိုင်မိအောင် ဟိုဘက်ဒီဘက် လှည့်ရတာလည်း ဇက်ကအနားမပေးရပဲ ၁၈၀ ဒီဂရီ လည်နေပါတော့တယ်...။ ကျွန်မအနေနဲ့ နေရာပြောင်းဖို့ နေရာလွတ်လေးများ ရှိလေမလားရယ်လို့ ဟိုဟိုဒီဒီ ကြည့်ပေမယ့်လည်း ခရီးသည်က အတက်ပဲရှိတယ် အဆင်းမရှိဘူး...။ ကျွန်မကလည်း “ငါ အခွင့်သာတာနဲ့တပြိုင်နက် ငါ့သူငယ်ချင်းတွေ မျက်နှာမူထားတဲ့ ဘက်ကို ငါ့ကိုယ်ကို လှည့်ပစ်မယ် ...ဒင်းကို ကျောပဲ ပေးထားမယ်.....” လို့ စိတ်ထဲမှာ တေးထားတာပေါ့...။

ဒီလိုနဲ့ ကြိတ်မှိတ်သည်းခံပြီး ပြည်နားကို တဖြည်းဖြည်းနီးလာရော ဆိုပါတော့...။ အဲဒီမှာ ကားက နဲနဲချောင်စပြုလာပါပြီ...။ အဲဒါနဲ့ ပြည်မြို့ထဲကို အ၀င် တစ်နေရာမှာ ကျွန်မဘေးက လူတွေလဲ ဆင်းသွားရော... ကျွန်မလည်း ဘာပြောကောင်းမလဲ ၀မ်းသာအားရနဲ့ အပိုင်ပဲဆိုပြီး မတ်တတ်မရပ်ဘဲ ထိုင်လျက်သားကနေပဲ ခန္ဓာကိုယ်ကို ဆုံလည်လိုသဘောထားပြီး ခြေထောက်နှစ်ချောင်းကိုပဲ စွေ့ခနဲနေအောင် မြှောက်ပြီး တစ်ဖက်ကို လှည့်လိုက်တာပေါ့...။ အဲ.... အဲဒီမှာတင်ပဲ ကျွန်မရဲ့ခြေထောက်နှစ်ချောင်းက အဆုံးအထိ ပါမလာပဲ လမ်းတစ်ဝက်မှာတင်ပဲ တစ်ခုခုနဲ့ညှိနေသလိုမျိုး ခံစားလိုက်ရပြီး အဲဒီလို ခံစားမှုနှင့် တစ်ပြိုင်နက်တည်းမှာပဲ “...ဟ..ဟ...လုပ်ပါဦး...ပုဆိုး...ပုဆိုး...ကျနော့်ပုဆိုး .... ” ဆိုတဲ့ အော်သံကြောင့် မြှောက်တက်နေတဲ့ ကျွန်မရဲ့ ခြေထောက်အစုံကို လှမ်းကြည့်လိုက်တော့ အောင်မလေး မြင်လိုက်ရတဲ့ မြင်ကွင်းက မထိတ်သာ မလန့်သာ ...ကျွန်မအရှေ့က ကျေးဇူးရှင်ရဲ့ ပုဆိုးကွင်း အောက်စက ကျွန်မခြေထောက်နှစ်ချောင်းမှာ စွပ်လျက်သားကြီး...။ သူကလည်း ပြောပြောဆိုဆို ပြာပြာသလဲနဲ့ ကျွန်မခြေထောက်မှာ စွပ်နေတဲ့ သူ့ရဲ့ပုဆိုးစကို အတင်းဆွဲချွတ်...ကျွန်မမှာလည်း ဟိုဘက်တစ်ဘက်ကို ပြောင်းချဖို့ မကြွထားတဲ့ ခြေအစုံကို သူ့ဘက်ပဲ ပြန်ချရတော့မလို ဟိုဘက်ပဲ ဆက်သယ်သွားရမလိုနဲ့ ခုံပေါ်မှာ တန်းလန်းကြီး...။ ကျွန်မတို့နှစ်ယောက်ရဲ့ အဖြစ်ကို ကားပေါ်မှာပါလာတဲ့ သူတွေကလည်း တ၀ါးဝါးနဲ့ ဖြစ်ကုန်လိုက်ကြတာ...ပြောမနေပါနဲ့တော့...။

ဖြစ်ပုံက ဒီလိုလေ...။ ကျွန်မနဲ့သူနဲ့ မျက်နှာချင်းဆိုင် ထိုင်နေတုန်းက ခြေထောက်တွေက အောက်ကို အသီးသီး ချထားကြရတာဆိုတော့ အနေအထားအရ ကျွန်မရဲ့ ခြေထောက်အစုံက သူ့ပုဆိုးကွင်းစ အောက်ဘက်ထဲမှာ ရောက်နေတာ နေမှာပေါ့...။ ကျွန်မပြောခဲ့ပါရောလား...၀တ်ထားတဲ့ ပုဆိုးကလည်း ပွပွဖောင်းဖောင်းနဲ့ပါဆို....။ တကယ်လို့သာ သူပဲ ဖြစ်ဖြစ် ကျွန်မပဲ ဖြစ်ဖြစ် တစ်ယောက်ယောက်က ဆင်းရမယ့်နေရာရောက်လို့ မတ်တတ်ထရပ်လိုက်မယ် ဆိုရင်တော့ ဘာပြဿနာမှ မရှိပေမယ့် အခုလို ကျွန်မက ထိုင်ရာကနေ မထပဲ ခြေထောက်နှစ်ချောင်းကိုပဲ မယူလိုက်ပြီး ဟိုဘက်တစ်ဖက်ကို ပြောင်းလှည့်ဖို့ ကြိုးစားလိုက်တော့ သူ့ပုဆိုးကွင်းကြီး တစ်ခုလုံးကို ကျွန်မခြေထောက်နှစ်ချောင်းနဲ့ စွပ်ပြီး မယူလာလိုက်သလိုမျိုး ဖြစ်သွားတာပေါ့...။

သူဖြင့် ဘယ်လို ခံစားလိုက်ရလဲတော့ မသိဘူး...။ ကျွန်မမှာဖြင့် ရှက်လိုက်တာဆိုတာ ကားပေါ်မှာ ဘယ်သူ့ကိုမှလည်း မော့မကြည့်ရဲတော့ပဲ ခေါင်းကြီးကို ငုံ့ထားပြီး ကားဂိတ်ကို မြန်မြန်ရောက်ပါစေပဲ တွင်တွင် ဆုတောင်းနေမိပါတော့တယ်...။ ကားဂိတ်လည်းရောက်ရော ဘာပြောကောင်းမလဲ နောက်ကြောင်းကို လှည့်မကြည့်တော့ပဲ တစ်ချိုးတည်းကို ပြေးမိတော့တာပါပဲ...။

ရှက်စရာကောင်းလိုက်တဲ့ ဖြစ်ခြင်းနော်...။ တော်တော်လေးကို ရှက်ခဲ့မိတဲ့ အပြင် အခုအချိန်အထိ ပြန်တွေးလိုက်မိတိုင်းလည်း ရီချင်ပက်ကျိ ဖြစ်နေရတော့တာပါပဲ...။ ဒါကတော့ ကျွန်မရဲ့ ရှက်ကိုယ်တွေ့ပေ့ါ။

ကျွန်မကိုယ်တွေ့မဟုတ်ပဲ ကျွန်မ အစ်မရဲ့ ကိုယ်တွေ့လည်းရှိသေးတယ်...။ ကြုံတုန်း တစ်ခါတည်း ပြောပြလိုက်ဦးမယ်...။ သူကလည်း တစ်ရက် အဲဒီလက်ခုပ်ပင် ရွာဘက်ကို ကိစ္စတစ်ခုရှိလို့ အသွား ထုံးစံအတိုင်း လိုင်းကားစီးတော့ ကားကလူပြည့်နေပြီး အလယ်မှာလဲ ဆန်အိတ်တွေနဲ့ဆိုတော့ကာ ကားနောက်အစွန် ဆန်အိတ်လေးပေါ်မှာပဲ ထိုင်ချလိုက်ပြီး နောက်က ခြေချခုံကို မျက်နှာမူလျက်ပေါ့...။ အဲဒီမှာ ကျွန်မအစ်မကို ၀န်းရံပိတ်ထားတာက ခြေချခုံပေါ်မှာ မတ်တတ်ရပ်တွယ်စီးပြီး လိုက်လာတဲ့ ကျောင်းသားတွေ...။

ဒီလိုနဲ့ လမ်းတစ်လျှောက် ကားက အရှိန်နဲ့မောင်းတော့ လေတွေကလည်း တဟူဟူးတိုက်တာပေါ့...။ ကျွန်မ အစ်မကလည်း တလူလူလွင့်နေတဲ့ သူ့ထမီအောက်စလေးကို ဒူးခေါင်းကြားလေးထဲ ဆွဲဆွဲသွင်းပြီး မကြာခဏ သိမ်းသိမ်းပေးရတာပေါ့...။ အင်း...ကျွန်မ အစ်မတစ်ယောက် တွေးမိတွေးရာတွေး ငေးမိငေးရာငေးပြီး ဘယ်လောက်တောင် အဆွဲလွန် အသိမ်းလွန်သွားလဲ မသိဘူး။ တစ်နေရာလည်းရောက်ရော...သူ့ရှေ့က ကျောင်းသားလေးက... “ဟာ..အစ်မကြီး အစ်မကြီး ကျွန်တော့ပုဆိုးကို ဘာလို့ဆွဲနေတာလဲဗျ.......” ဆိုတဲ့အသံကြားမှ ကြည့်လိုက်တော့ လားလား...သူ့ထမီစအောက်မေ့လို့ သူ့ဒူးခေါင်းနှစ်လုံးကြားထဲကို အတင်းဆွဲသွင်းနေတာ လတ်စသတ်တော့ သူ့ရှေ့က ကောင်လေးရဲ့ ပုဆိုးစကြီးကို ဆွဲသွင်းနေတာပါလား...။ တော်သေးလို့ပေါ့နော်...အချိန်မီသိလိုက်ပေလို့သာ...နို့မို့လို့ကတော့ မတွေးရဲစရာပဲ....။

ကဲကဲ...အဲဒါသာကြည့်တော့ အင်ကြင်းသန့်တို့ ညီအစ်မတတွေကတော့ အဲလိုပါဆို...။

(မှတ်ချက်။ ။ဒီပိုစ့်ကို နာမည်ပေးမလို့ စဉ်းစားလိုက်တော့ ရုတ်တရက် ချစ်လှစွာသော မမကြီး ဒေါ်ရွှေစင်က သူ့နဲ့ သူ့ရဲ့ ချစ်ချစ်ကြီးရဲ့ အကြောင်းတွေကို ချစ်ကိုယ်တွေ့လို့ နာမည်ပေးပြီး ရေးတတ်တာကို သတိရသွားပြီး ကျွန်မကလည်း ကျွန်မရဲ့ရှက်စရာ ကိုယ်တွေ့ ဇာတ်လမ်းမို့ ရှက်ကိုယ်တွေ့လို့ ပေးလိုက်မယ်ဆိုပြီး ဆုံးဖြတ်လိုက်ပါတယ်...။ တော်သေးတာပေါ့နော်...အဲဒီ ကားပေါ်က မောင်မင်းကြီးသားနဲ့ ဇာတ်လမ်းက အဲဒီမှာတင်ပြီးသွားလို့ ...။ တော်ကြာ သူလည်းရှိုး ကိုယ်လည်းရှိုး နှစ်ဦးနှစ်ဖက် ရှိုးပြီး အကြည်တွေဆိုက် ဇာတ်လမ်းတွေများသာ ဖြစ်ခဲ့ရင်တော့ ဒီပိုစ့်က ရှက်ကိုယ်တွေ့ မဟုတ်ပဲ ချစ်ကိုယ်တွေ့ ဖြစ်သွားလောက်တယ် :)))))

ဓါတ်ပုံလေးက ဒီနေရာကနေ ယူထားတာပါ။

pika26pika26pika26pika26pika26pika26pika26pika26pika26

Friday, April 23, 2010

စိတ်သဘောနှယ်

လူတွေရဲ့ စိတ်သဘော၊ သဘာဝတွေဟာ ကိုယ့်ကိုကိုယ်သာ ပြန်သုံးသပ်ကြည့်ဖြစ်ခဲ့မယ်ဆိုရင် တစ်ခါတစ်ခါမှာ ဆန်းကျယ်လှစွာနဲ့ ရယ်မောဖွယ်ရာတော့ ကောင်းလှပါသည်။ လူတိုင်းကိုတော့လည်း မဆိုလိုပါဘူး.. . အဓိကကတော့ ကျွန်မကိုယ်ကျွန်မ ပြောချင်တာပါ...။ ဘယ်လိုမျိုးလည်းဆိုရင် ဘ၀မှာ တစ်ခါတစ်ရံ အလွန်မှ စိတ်တို၊ စိတ်ဆိုး ဒေါသထွက်ချင်စရာ၊ မနာလိုဝန်တိုဖြစ်လောက်ချင်စရာ၊ ကြီးကြီးမားမား ကိစ္စမျိုးတွေနဲ့ ကြုံတွေ့ရတတ်သော်လည်း အံ့သြစရာ ကောင်းလောက်အောင်ပင် စိတ်ထဲမှာ မှတ်မှတ်ထင်ထင် မရှိတတ်၊ မထားတတ်ပဲ မေ့မေ့ပျောက်ပျောက် နေနိုင်ပြီး တစ်ခါတစ်လေကျတော့လည်း တကယ့်ကို သေးသေးမွှားမွှား ကိစ္စလေး၊ ပေါ့ပေါ့ပါးပါး သဘောထားရမယ့် ကိစ္စမျိုးလေးတွေမှာကျတော့ အကြီးအကျယ်စိတ်ခံစားမှုတွေ လိုက်ပြီး ဖြစ်မိနေတတ်တာမျိုးပေါ့ ။ ဘာလို့ အဲဒီလို ပြောရသလဲဆိုတော့ အခုလတ်တလောမှာ ဖြစ်ပျက်သွားတဲ့ အကြောင်းအရာလေး တစ်ခုအပေါ်မှာ ကျွန်မစိတ်ကိုကျွန်မ ပြန်သုံးသပ်မိတဲ့ အဖြစ်တစ်ခုကြောင့်ပါ။


```````````````````````````````````````````````````````


ကျွန်မရဲ့စိတ်ဟာ ပင်ကိုသဘာဝအနေနဲ့တော့ ခွေးလေးတွေ၊ ကြောင်လေးတွေ စတဲ့ တိရစ္ဆာန်လေးတွေ (ကျွန်မမျက်စိထဲမှာ ချစ်စရာကောင်းတယ်လို့ ထင်မြင်မိတဲ့ အကောင်လေးတွေ မှန်သမျှ) ကို အကုန်ချစ်တတ်တဲ့သူ တစ်ယောက်လို့ ပြောလို့ရပါတယ်...။ ကျွန်မစိတ်ထဲမှာ အရင်တုန်းက ကျွန်မကိုယ် ကျွန်မလည်း ဘယ်လိုခွေးလေး၊ ကြောင်လေးမျိုးတွေကိုမဆို၊ ဘယ်လိုအခြေအနေမျိုးမှာမဆို ခြွင်းချက်မရှိ ချစ်တတ်လိမ့်မယ်လို့လည်း ကိ်ုယ့်ကိုကိုယ် တွေးထင်နေခဲ့မိဘူးပါတယ်...။ ဒါပေမယ့် အဲဒီအတွေးက သူတို့နှစ်ကောင်နဲ့ တွေ့တဲ့အချိန်မှာတော့ လုံးဝမှားယွင်းသွားပြီဆိုတာ သိလိုက်ရပါတော့တယ်...။ သူတို့နှစ်ကောင်ဆိုတာက ကျွန်မနဲ့ အခုအတူနေနေတဲ့ ကျွန်မ အစ်မတို့ အိမ်က “ကလေးလေး” နဲ့ “ကပ္ပလီ” ဆိုတဲ့ ကြောင်လေးနှစ်ကောင်လေ...။ “ကလေးလေး” နဲ့“ကပ္ပလီ” ဆိုတာက သူတို့ကို ကျွန်မဟာကျွန်မ ပေးထားတဲ့နာမည်တွေပဲ ဆိုပါတော့...။

ကြောင်လေးတွေဆိုလို့ ကျွန်မတို့ အိမ်မှာ အရင်တုန်းကတော့ ကြောင်လေးက တစ်ကောင်တည်းရှိတာပါ။ “ကလေးလေး” ဆိုပြီး ကျွန်မတို့က ချစ်စနိုးနဲ့ခေါ်တဲ့ ကျွန်မတို့မိသားစုရဲ့ အချစ်တော်ကြောင်လေးပေါ့...။ အိမ်က ကြောင်ဆိုပေမယ့် အိမ်မှာ တရားဝင်လိုင်စင်နဲ့ မွေးထားတာမျိုးတော့ မဟုတ်ပါဘူး...။ ဒီမှာက ခွေးတွေ၊ ကြောင်တွေ မွေးချင်ရင် လိုင်စင်နဲ့ ဘာနဲ့ မွေးရတာလေ...။ ဒီကြောင်လေးက ကျွန်မတို့ အိမ်ကို ဘယ်လိုရောက်လာတာလဲဆိုတော့ ကျွန်မအစ်မတို့ လင်မယား အခုနေတဲ့ တိုက်ခန်းကို စတင်ပြောင်းရွှေ့လာတော့ ကျွန်မတို့ အခန်းဘေးကပ်လျက် မလေး(Malay)မိသားစုတွေနေတဲ့ အခန်းကနေ အဲဒီကြောင်လေးက တညောင်ညောင်နဲ့အော်ပြီး အိမ်ထဲကို သူ့ဟာသူဝင်ချလာတာ အဲဒီကတည်းက လုံးဝ မပြန်တော့တာတဲ့...။ သူကလည်းမပြန်တော့သလို ပိုင်ရှင်တွေကလည်း ပြန်မခေါ်တော့ပဲ ကျွန်မအစ်မတို့ဆီမှာပဲ ကြည်ကြည်ဖြူဖြူ နေခွင့်ပြုလိုက်ပါတယ်။ ကျွန်မအစ်မတို့ လင်မယားကလည်း ကလေးကို အရူးအမူးပဲ လိုချင်ကြပေမယ့်လည်း မရကြရှာတော့ အဲဒီကြောင်လေးကိုပဲ သူတို့သားလေးလို ချစ်သွားကြတာလေ...။ အဲဒီတော့ ကျွန်မ အစ်မတို့အိမ်ကို ကျွန်မပြောင်းလာတော့ကာ သူက ရှိနှင့်နေပြီးပါပြီ။ ဒီကြောင်လေးနဲ့ ကျွန်မတို့နဲ့က တော်တော်ရေစက်ပါတယ်လို့တော့ ပြောလို့ရပါတယ်။

တကယ်တော့ ကလေးလေးဟာ သိပ်ကိုလိမ္မာပြီး အကင်းပါးတဲ့ ကြောင်ကလေးပါ...။ သူဘယ်လောက်ထိ သိတတ်သလဲ၊ လိမ္မာသလဲဆိုတာကို ပြောပြရရင် ယုံကြမှာတောင် မဟုတ်ပါဘူး...။ ကိုယ်တွေ့ကြုံဘူးတဲ့သူမှပဲ ယုံကြမှာပါ။ ကလေးလေးက ကျွန်မတို့အိမ်မှာ အမြဲတစ်စေ ၂၄နာရီပတ်လုံး နေနေတာတော့ မဟုတ်ပါဘူး...။ ကျွန်မတို့ကလည်း နေ့တိုင်းရုံးသွားနေရတာဆိုတော့ အိမ်မှာ အချိန်ပြည့် မရှိကြဘူးလေ...။ သူ့မှာက သူနဲ့ အတူတူ ဆော့ကစားစရာ အဖော်ကြောင်လေးတွေ အများကြီးရှိပါတယ်။ ကျွန်မတို့ တိုက်ခန်းနားမှာရှိတဲ့ ကားပတ်ကင်တစ်ဝိုက်မှာ နေထိုင်နေကြတဲ့ ပိုင်ရှင်မရှိတဲ့ ကြောင်လေးတွေက အများကြီးပါပဲ...။ သူက အောက်ကိုဆင်းဆင်းပြီး အဲဒီကြောင်လေးတွေနဲ့ ဆော့နေကျလေ...။ ဒါပေမယ့် သူဗိုက်ဆာပြီဆိုတဲ့ အချိန်ကျရင်တော့ ပြန်လာတတ်ပါတယ်...။ စားလို့ဝသွားပြီဆိုရင် တစ်ခါ သွားပြန်ဆော့ပြန်တယ်...။ ဒါပေမယ့် ညအိပ်ချိန်ရောက်ရင်တော့ အမြဲ အိမ်မှာ ပြန်လာအိပ်ပါတယ်...။ ကျွန်မ အစ်မက အိပ်ခါနီးရင် သူနဲ့အတူ အဲဒီကြောင်လေးကိုပါ ရေအတူချိုးပေးပြီး ရေခြောက်အောင်သုတ်၊ dryer နဲ့ မှုတ်ပေးပြီးမှ ကျွန်မအစ်မတို့ လင်မယားနဲ့ အတူတူအိပ်တာပါ..။ သူဟာ ကျွန်မ အစ်မတို့လင်မယားရဲ့ အသည်းကျော်ရာထူးကို ရထားသူလည်း ဖြစ်ပါတယ်...။

''သားရေ...သားဗိုက်ဆာနေပြီလား...သားလေးဘာစားချင်လည်း အမေ့ကိုပြော....''

''သားနော်...အောက်မှာ မိုးတွေရွာနေတယ် အောက်ကို ဆင်းမဆော့ရဘူး...အိမ်ပေါ်မှာပဲနေရမယ်...''

''ကိုကြီးရေ...မိုးချုပ်နေပြီ... ရှင့်သားပြန် မလာသေးဘူး...လိုက်ရှာပါဦး...''

အဲဒီ အသံတွေကတော့ ကျွန်မ အစ်မဆီကနေ နေ့တိုင်း လိုလို ကြားရမယ့် ကလေးလေးနဲ့ပတ်သက်ပြီး ပြောနေတဲ့ စကားသံတွေပါပဲ...။ ကျွန်မတို့အိမ်ဘေးနားကနေ မြန်မာတစ်ယောက်ယောက်သာ ဖြတ်သွားမယ် ဆိုရင်တော့ ဒီလိုအသံမျိုးတွေ ကြားရင် ဒီအိမ်မှာ ကလေးငယ်ငယ်လေးတစ်ယောက် ရှိတယ်လို့ မုချကျိန်းသေ ထင်မိမှာပါပဲ...။ကျွန်မနဲ့ အဲဒီ ကလေးလေးရဲ့ အကြောင်းကို ပြောပြရမယ်ဆိုရင် တော်တော်တော့ ရီစရာ ကောင်းလှပါတယ်...။ ကိုယ့်ကိုကိုယ် ရှက်လည်း ရှက်မိပါရဲ့...။


````````````````````````````````````````````````````````

ဖေဖေ၊ မေမေတို့နဲ့ ဝေးနေတဲ့ ရေခြား မြေခြားမှာ လာပြီး အလုပ်လုပ်နေရတဲ့ ကျွန်မအဖို့တော့ အခုအတူတူနေနေတဲ့ အစ်မလင်မယားက မိဘကလွဲရင် မိဘတွေလိုပါပဲ...။ ဖေဖေနဲ့မေမေကလည်း ဒီအစ်ကိုနဲ့ အစ်မတို့ကို မိဘတွေလို သဘောထားပြီး ဆက်ဆံဖို့ကို မြန်မာပြည်ကနေ ကျွန်မကို အမြဲမှာကြားလေ့ရှိပါတယ်။ ဒီလိုနဲ့ ကျွန်မ အစ်မတို့ အိမ်ကို ကျွန်မစရောက်တဲ့ ရက်တွေမှာပဲ ကျွန်မအနေနဲ့ အထူးသတိထားလိုက်မိတာက ကျွန်မအစ်မတို့ လင်မယားက အဲဒီကြောင်လေးကို ပုံမှန်ထက်ကို ပိုမိုလွန်ကဲစွာ၊ ချစ်ခင်ယုယစွာနဲ့ ပြောဆိုဆက်ဆံကြတယ် ဆိုတာပါပဲ...။ အဲဒီမှာ ဇာတ်လမ်းက စတာပါပဲ...။ ကလေးမရှိတဲ့ ကျွန်မ အစ်မတို့ လင်မယားဆီမှာ ကလေးလို နေနေချင်တဲ့ ကျွန်မက သူတို့ လင်မယား အနေနဲ့ ကလေးလေးကို အဲဒီလို တယုတယ ပြောဆိုပြီး အဖြစ်သည်းနေတာကို မြင်တွေ့နေရတာ ကျွန်မစိတ်ထဲမှာ မြင်ပြင်းကတ်သလို ဖြစ်ဖြစ်လာပါတယ်...။

''ဟင်း...ဟင်း...ငါနော်... နင့်ကို ရိုက်လိုက်မှာနော်... ငါ့နားလာပြီး တညောင်ညောင်နဲ့ လုပ်မနေနဲ့....သွား နားငြီးတယ်...''

(လက်က တရွယ်ရွယ်နဲ့ ပြောသေးတာ....တကယ်တော့ ဘယ်တုန်းကမှလည်း ရိုက်တာမဟုတ်ပါဘူး...)

''ပုစွန်ခြောက်တွေ နင်ကြီးပဲ စားနေတာနော်... ငါတို့စားဖို့တောင် မကျန်တော့ဘူး...ပုဇွန်ခြောက်က ဒီမှာ ဘယ်လောက် ဈေးကြီးတယ်ထင်လဲ...ငါတို့တောင် ချွေစားနေရတာဟွန်းးးးးးးး ''

စသည်ဖြင့် ကျွန်မဟာ ကလေးလေး အပေါ်မှာလိုက်ပြီး ငြူစူပြောဆိုလေ့ရှိပါတယ်...။ ကဲ...လူ့စိတ်များ ပြောပါတယ်နော်လို့...။ တကယ်ဆိုရင် ကျွန်မဟာ ဘယ်လောက်ပဲ ကြောင်လေးတွေကို ချစ်တယ်ဆိုဆို အခု ကျွန်မအစ်မက ကျွန်မကို ဂရုမစိုက်ပဲ သူ့ကြောင်လေးကိုပဲ တစ်မမ လုပ်နေရင် ကျွန်မက ဘေးကနေ ကျလိကျလိ ဖြစ်နေတဲ့ အဖြစ်ဟာ တကယ်တော့ ကျွန်မအနေနဲ့ ဒီကြောင်လေးကို မနာလိုနေတာ မဟုတ်ပေဘူးလား...။ ဒီလို တိရစ္ဆာန်ကြောင်လေးသေးလေး တစ်ကောင်အပေါ်မှာ မနာလိုဝန်တိုစိတ်နဲ့ ငြူစူပြောဆို ရန်လုပ်နေတဲ့ ကျွန်မရဲ့ အဲဒီလိုအဖြစ်ဟာ ဘယ်လောက်တောင်များ ရှက်စရာကောင်းလိုက်ပါသလဲ...။

ဒါပေမယ့်လည်းလေ.... သိပ်သိတတ်တဲ့၊ သိပ်လိမ္မာလွန်းတဲ့ ကလေးလေးအပေါ်မှာ ကျွန်မဟာ အဲဒီလိုစိတ်မျိုးတွေကို ကြာကြာတော့ မထားနိုင်ပါဘူး...။ သေးသေးဖွဲဖွဲ အရာလေးတွေကမှအစ ဘယ်အရာကိုမဆို သိပ်သံယောဇဉ်တွယ်တတ်လွန်းတဲ့ ကျွန်မဟာ... အတူတူနေလာတာလည်း ကြာရော ဒီကလေးလေးကို ကျွန်မ အစ်မတို့နဲ့ ထပ်တူ ထပ်မျှပဲ ချစ်သွားပါတော့တယ်...။ ကျွန်မက ကိုယ့်စိတ်ကိုကိုယ် ပြန်ပြန်သုံးသပ်ပြီး ပြင်သင့်တာဆိုရင် ပြင်လိုက်တာလည်း ပါမယ် ထင်ပါတယ်...။

ဘယ်လောက်ထိများလဲဆိုတော့ အခုဆို ကျွန်မ ရုံးကများ ပြန်လာပြီဆိုရင် ကျွန်မတို့ တိုက်ခန်းနားက ကားတွေထားတဲ့ ကားပတ်ကင်ကွင်းထဲကို ဖြတ်နေပြီဆိုရင်ပဲ ကျွန်မရဲ့ မျက်လုံးတွေက ကလေးလေး ကို ရှာနေပါပြီ...။ သူကလည်း ဘယ်နားကနေမှန်းမသိ ကျွန်မဆီကို ရုတ်တရက် ဘွားကနဲ ထွက်ထွက်လာတတ်ပါတယ်...။ သူက ကျွန်မရုံးကပြန်လာမယ့် အချိန်ကိုဆို သိနေပြီး နေ့တိုင်း ကျွန်မကို စောင့်စောင့်ကြိုနေတတ်တာလေ...။ ကျွန်မကို မြင်တာနဲ့ကျွန်မဆီကို ပြေးလာရုံနဲ့တင် မပြီးသေးပါဘူး။ ကျွန်မကို သူနဲ့အတူ ဆော့စေချင်သေးတာပါ...။ ကျွန်မက သူ့ကို ကောက်ချီလိုက်ရင် ချက်ချင်း ဘယ်တော့မှ အချီမခံဘူး...။ ဟိုပတ်ပြေး ဒီပတ်ပြေး... ကားအောက်တွေထဲ ၀င်ပုန်းနေလိုက် .... ကျွန်မက ရှာမတွေ့တော့လို့ ''ကလေးလေးရေ.... ''ဆိုပြီး ဟိုဟိုဒီဒီ လိုက်ရှာ အော်ခေါ်ရင် လှစ်ကနဲ ပြန်ထွက်လာလိုက်.... ကျွန်မက မခေါ်တော့ပဲ ရှေ့ကနေထွက်သွားရင် နောက်ကနေ လွှားကနဲ အပြေးလိုက်လာလိုက်နဲ့ ကျွန်မမှာနေ့တိုင်း ရုံးကပြန်လာရင် မောမောနဲ့ ဗိုက်ဆာရတဲ့ ကြားထဲ သူနဲ့အတူ ပြေးတမ်း လိုက်တမ်း ဆော့ရသေးတာက အလုပ်တစ်ခုပါ...။

အဲဒါပြီးလို့ ကျွန်မ အိမ်တံခါးကို သော့ဖွင့်နေတဲ့ အချိန်ဆို သူက ဘေးကနေ အသာလေး ငြိမ်ပြီးကြည့်နေတတ်တယ်...။ ကျွန်မ တံခါးပေါက်ကို လှပ်လိုက်ပြီဆိုတာနဲ့ တစ်ပြိုင်နက်တည်း အိမ်ထဲကို ကဆုန်ပေါက်ပြေးဝင်ပြီး သူ့အတွက် အစာတွေထည့်ထားတဲ့ ဗူးဆီကို တန်းပြေးတော့တာပဲ...။ ပြီးတာနဲ့ ဗူးနားမှာ တုန့်ကနဲရပ်ပြီး ကျွန်မကို လှမ်းကြည့်တယ်...။ သဘောကတော့ အစာထည့်ပေးပါပေါ့...။ ကျွန်မက သူ့ကို အစာတွေ သောက်ရေတွေ အကုန်ထည့်ပေးပြီးပြီ ဆိုရင်တော့ ကလေးလေးတို့ ခေါင်းမဖော်တမ်း စားပါပြီ... ။ ရေဆိုလဲ တစ်ဂွပ်ဂွပ်နဲ့ သောက်ချလိုက်တာများ သူ့ကို ထည့်ပေးထားတဲ့ ရေတစ်ခွက်လောက်များ ခဏလေးပါပဲ....။ ဒီလိုနဲ့ သာသာယာယာရှိနေတဲ့ ကလေးလေးနဲ့ ကျွန်မတို့ရဲ့ ဘ၀ထဲကို နောက်ထပ် ဧည့်သည်တစ်ယောက် ထပ်မံရောက်ရှိလို့လာတယ်ပဲ ဆိုပါတော့...။

````````````````````````````````````````````


တစ်ညပေါ့...​ ကျွန်မ အစ်မက အပြင်ကနေ ပြန်လာတော့ အခန်းဝကနေပြီး ကျွန်မကို “အင်ကြင်းရေ...ဒီမှာကြည့်စမ်း ဧည့်သည် ပါလာတယ်...” ဆိုပြီး လက်ထဲမှာ ပွေ့ထားတဲ့ တစ်စုံတစ်ရာကို လှမ်းပြလိုက်ပါတယ်...။ ကျွန်မကလည်း အိပ်ချင်မူးတူးနဲ့ ဆိုတော့ ဘာမှန်း သေသေချာချာလှမ်းမကြည့်လိုက်ဖြစ်ပါဘူး...။ ဒီလိုနဲ့ ကျွန်မလည်းပဲ အိပ်ပျော်သွားပြီး နောက်နေ့မနက် အရမ်းကို အိပ်လို့ကောင်းနေတဲ့ ဝေလီဝေလင်း အချိန်လောက်မှာ ကျွန်မဘေးနားမှာ တစ်စုံတစ်ယောက် ရောက်နေသလိုမျိုး ချိုးချိုးချွတ်ချွတ် အသံကို ကျွန်မ နားထဲမှာ ကြားနေရပြီး ကျွန်မလည်း အနည်းငယ်နိုးသွားပါတယ်...။ အဲဒါနဲ့ မျက်စိကိုမဖွင့်ပဲနဲ့ လက်နဲ့လိုက်စမ်းကြည့်လိုက်တော့ .... ဘုရား...ဘုရား... ခပ်ပျော့ပျော့နဲ့ နွေးတေးတေးရှိနေတဲ့ အရာတစ်ခု..... သက်ရှိတစ်စုံတစ်ရာရဲ့ အသား ပဲလို့ စိတ်ထဲမှာ ထင်မိသွားတယ်...။

ကျွန်မလည်း ထိတ်ကနဲဖြစ်သွားကာ “ဘုရားရေ...ဘာပါလိမ့်...” ဆိုပြီး မျက်လုံးအစုံကိုလည်း ဖွင့်ကြည့်လိုက်ရော.... “အောင်မယ်လေးးးးးးး.........မည်းမည်းကြီး....မည်းမည်းကြီး” မည်းတာမှ ကတ္တရာစေးက အဖေခေါ်ရလောက်အောင်ကို မည်းနက်နေတာ.... ကျွန်မ ဘေးက ကျွန်မလက်တော့ပ် အဖုံးပေါ်မှာ ငုတ်တုတ်ထိုင်ပြီး ကျွန်မကို ပြူးပြူးကြီးနဲ့ စိုက်ကြည့်နေတာ..... ကျွန်တစ်ကိုယ်လုံးလည်း ကြက်သီးမွေးညှင်းတွေ ထသွားပြီး ကြောက်အားလန့်အားနဲ့ သူ့ကို ကုတင်ပေါ်ကနေ တွန်းချလိုက်မိသလား... ကန်ချလိုက်မိသလားတောင် မမှတ်မိတော့ပါဘူး....။

ကြောင်လေ....ကြောင်.... ကျွန်မ အစ်မနဲ့ ပါလာတဲ့ ဧည့်သည်တော်ကြောင်ပေါ့...။ တစ်စက်မှ ချစ်စရာ သွင်ပြင်က္ခဏာ မရှိတဲ့ကြောင်...။ အလွန်အင်မတန်မှ တန်ဖိုးရှိလှတဲ့ ကျွန်မရဲ့ ရုံးပိတ်ရက် မနက်ခင်းလေးမှာ ကျွန်မကို အိပ်နေရာကနေ အထိတ်တလန့်နဲ့ နိုးအောင် လုပ်တဲ့ကြောင်... အစုတ်ပလုတ်ကြောင်.. .ကပ္ပလီကြောင်....။ အဲဒါနဲ့ ကျွန်မလည်း ကျွန်မအစ်မကို “မမက ဘာမှန်းလည်း မသိဘူး ... ဒီလောက်မည်းတူးနေတဲ့ကြောင်ကို ဘယ်ကများ ခေါ်လာတယ် မသိဘူး...ဘာညာ'' နဲ့ ပွစိပွစိလုပ်ပြီး ပြန်အိပ်လို့လည်း မရတော့မယ့်အတူတူ ရေချိုးခန်းဝင်လိုက်ပါတယ်....။ ရေချိုးပြီးလို့ ကျွန်မရဲ့ စိတ်ကလေးလည်း ကြည်ကြည်လင်လင်ရှိသွားပြီး အပြင်ကို ထွက်ဖို့ ရေချိုးခန်းတံခါးကို ဆွဲအဖွင့် ..... “၀ုန်း” ကနဲဆို ကျွန်မရှေ့ကို ခုန်ချလာတဲ့ အရာတစ်ခု ၊ ကျွန်မှာ ဒုတိယအကြိမ်မြောက် အထိတ်ထိတ်အလန့်လန့် ဖြစ်ရပြန်ပြီး ကြည့်လိုက်တော့...အခုနကကြောင်....။ ကျွန်မလေ.....စိတ်တိုလိုက်တာမှ....ကြည့်ပါဦး.... ညကမှ ဒီအိမ်ကိုရောက်တယ်... ဒင်းက ကျွန်မတို့အိမ်နေရာအနှံ့ကို ၀င်ထွက် သွားလာနေလိုက်တာများ သူနှစ်ပေါင်းများစွာ ရင်းနှီးကျွမ်းဝင်နေလာခဲ့တဲ့ နေရာကျနေတာပါပဲ...။ ကျွန်မသူ့ကို မျက်စိထဲမှာ တော်တော် ကန့်လန့် ဖြစ်သွားပါတယ်...။

ဒါပေမယ့် ကျွန်မ အစ်မတို့လင်မယားက ထုံးစံအတိုင်း “သမီးလေး...သမီးငယ်လေး...”နဲ့ဖြစ်နေတော့ရာ ကျွန်မက ဘာမှ မတတ်နိုင်ပါဘူး....။ ရှိစေတော့ပေါ့....။ သို့ပေမယ့်လို့ ကျွန်မ သည်းမခံနိုင်တဲ့ အကြောင်းအရာတစ်ခုက ထပ်ဖြစ်လာပါတယ်...။ ကျွန်မတို့အိမ်က ကလေးလေးက ဘယ်ဘ၀က ရေစက်လည်း မသိဘူး အဲဒီကြောင်ကပ္ပလီကို ကြောက်ပြီး အိမ်မှာ မနေရဲတော့ပါဘူး...။ အပြင်မှာချည်းပဲ လျှောက်သွားနေပြီး အစာစားချိန်လေး ပြန်လာရင်တောင် ခုနက ကပ္ပလီလေးကို တွေ့ရင် အိမ်ထဲ မ၀င်ရဲတော့ပဲ အပြင်ကနေပဲ တညောင်ညောင်အော်နေရှာတော့တာ...။ ကဲ ... ဘယ်လောက် သနားစရာကောင်းလိုက်တဲ့ ကလေးလေးလဲနော်...။ ဒါပေမယ့် ဟိုကျေးဇူးရှင်မလေးကတော့ ''ဂရုမစိုက်ပေါင်'' ဆိုတဲ့ ပုံစံနဲ့အစားမပျက် အသောက်မပျက်ပါ....။ စားပြီးရင်လည်း ကျွန်မ အစ်မတို့ကုတင်ပေါ်ကို တက်တက်ပြီး ခန့်ခန့်ကြီး အိပ်နေတတ်သေးတာ...။

ကျွန်မကတော့ သူ့ရဲ့ မထီတထီ မျက်နှာပေးနဲ့ ကျွန်မရှေ့မှာ ငုတ်တုတ်ထိုင်ပြီး လျှာလေးနဲ့ သူ့ကိုသူ ဟိုလျက်ဒီလျက် လုပ်နေတာကို မြင်ရတိုင်း ကျွန်မရဲ့ ကလေးလေး အတွက်တွေးမိပြီး သူ့ကို ဒေါသသာ ထွက်မိနေပါတော့တယ်... ပိုဆိုးတာက ကျွန်မအစ်မတို့ကလည်း အဲဒီမည်းမည်းကဲကဲလေးကိုပဲ သဘောတွေကျနေပြီး သမီးလေး သမီးလေးနဲ့ ဖြစ်နေတော့ ကျွန်မရဲ့စိတ်ထဲမှာ ကလေးလေးရဲ့နေရာကို သူက အစားထိုးဝင်ယူမှာကို စိုးရိမ်နေမိပါတယ်...။ ကဲ...တကယ့်ကို ဘာမှမဟုတ်တဲ့ ကြောင်လေးတစ်ကောင်ရဲ့ အပေါ်မှာ ဖြစ်နေတဲ့ ကျွန်မရဲ့သဘောထားတွေဟာ အလွန်သေးသိမ်ပြီး ရီစရာကောင်းမနေဘူးလား...။ နောက်တစ်ခုက စိတ်ရဲ့သဘောများပြောပါတယ်...။ အရင်တုန်းကတော့ ကလေးလေး အပေါ်မှာ မနာလို ၀န်တိုစိတ်ဖြစ်တယ်....အခု ကလေးလေးကိုလည်း သည်းသည်းလှုပ်ချစ်သွားရော သူ့အတွက် တခြားကြောင်တစ်ကောင် အပေါ်မှာ မနာလို ၀န်တိုမှုတွေနဲ့ ညူစူနေမိပြန်တယ်...။ အင်း...အဲဒီလိုနဲ့ ကပ္ပလီမလေးအတွက် ကံဆိုးမယ့် တစ်နေ့လား၊ ကံကောင်းမယ့် တစ်နေ့လားတော့ မသိတဲ့ တစ်နေ့ကို ရောက်လာပါတယ်...။

```````````````````````````````````````````

ညတစ်ညပေ့ါ...ထုံးစံအတိုင်း ကျေးဇူးရှင်မလေးက ကျွန်မအစ်မတို့အိပ်ရာပေါ်မှာ အိပ်နေရင်းနဲ့ ကောင်းကောင်းမအိပ်ပဲ သေးပေါက်ချပါတယ်။ ကျွန်မ အစ်မကလည်း သိလည်းသိရော အရမ်းကိုစိတ်တို ဒေါသထွက်သွားပုံ ပေါ်ပါတယ်။ ကျွန်မအစ်မက တကယ့်ကို လူတစ်မျိုးလို့ ပြောလို့တော့ ရပါတယ်...။ သူက အဲဒီကြောင်တွေကို ဘယ်လောက်ပဲ ငုံထားမတတ်ချစ်ပေမယ့် စည်းကမ်းအရာမှာကျတော့ လုံးဝ မျက်နှာသာမပေးပါဘူး..။ ကြောင်လေးတွေကိုလည်း ရေချိုးခန်းထဲမှာပဲ ၀င်ပြီးတော့ အပေါ့အလေးသွားဖို့ကို လေ့ကျင့်ပေးထားပါတယ်...။ သူ့စည်းကမ်းအတိုင်း မလိုက်နာရင်တော့ သူက ရိုက်ပြီးဆုံးမတတ်တဲ့သူမျိုးပါ...။ ပြီးတော့ သူအဲဒီလို ရိုက်နေတဲ့အချိန် ဆိုရင်လည်း ဘယ်သူမှ ဘာမှ ၀င်ပြောလို့မရပါဘူး။ သိကြားမင်းတောင် ဆင်းတားလို့မရလောက်ပါဘူး...။ ကျွန်မကတော့ သူအဲဒီလို ကြောင်ကိုရိုက်ပြီး ဆုံးမနေတဲ့ အချိန်တွေဆိုရင် ကျွန်မကိုယ်တိုင်က လူကိုပဲဖြစ်ဖြစ် တိရစ္ဆာန်ကိုပဲဖြစ်ဖြစ် ရိုက်နှက်ဆုံးမတာမျိုး၊ လက်ပါတာမျိုးကို လုံးဝ လုံးဝမှ မနှစ်မြို့တဲ့သူတစ်ယောက် ဖြစ်နေတဲ့အပြင်၊ သူ့ကိုဝင်တားလည်း ဘာမှ အရာမထင်မှာကို သိနေလို့ (ကျွန်မကလည်း သူ့ကို ကြောက်ရတယ်လေ...) မကြားရက်လိုတာနဲ့သီချင်းကိုအကျယ်ကြီးဖွင့်ပြီး နားကြပ်ကို နားထဲဆို့ထားလိုက်လေ့ရှိပါတယ်...။

“ကလေးလေး” ကတော့ သူ့စည်းးကမ်းအတိုင်း တသဝေမတိမ်းလိုက်နာပြီး အပေါ့သွားချင်လည်း ရေချိုးခန်းထဲမှာပဲ သွားပန်းပါတယ်...။ အလေးသွားချင်ရင်လည်း ရေချိုးခန်းထဲမှာပဲ သွားပြီး သူ့ကိစ္စပြီးရင်လည်း ကျွန်မတို့ကို လာခေါ်ပြီး သူအလေးသွားထားတယ် ဆေးပေးလို့ရပါပြီ ဆိုတဲ့ပုံစံနဲ့ လာပြောသေးတာပါ...။ သူ့ကိုလည်း ကျွန်မအစ်မက ဒီကိစ္စနဲ့ပတ်သက်လို့ ငယ်ငယ်ပေါက်စလေးကတည်းက ရိုက်ပြီးလေ့ကျင့်ပေးထားတာလေ။ ဒါပေမယ့် ကလေးလေးက ဘယ်လောက်ချစ်ဖို့ကောင်းလဲဆိုတော့ သူ့ကို ဘယ်လောက်ရိုက်ရိုက် ဒီအိမ်ကနေ ခွာမသွားပဲ လေ့ကျင့်ပေးထားတဲ့အတိုင်း စည်းကမ်းကို အတိအကျ လိုက်နာတာလေ...။ ဒါကြောင့်လည်း ကျွန်မတို့ တအိမ်လုံးက ''ကလေးလေး'' ''သားသားလေး'' နဲ့ ဖြစ်နေတာပေါ့...။

ဒါပေမယ့် ကပ္ပလီမလေးကတော့ အဲဒီလိုမဟုတ်ဘူး...။ ကျွန်မအစ်မက ရိုက်ပြီးဆုံးမတော့ ကျွန်မအစ်မကို ပြန်ကိုက်၊ပြန်ကုတ်ဖဲ့ပစ်ပါတယ်...။ ကျွန်မအစ်မကလည်း သူ့ကို အဲဒီလိုပြန်လုပ်တော့ ဒေါသကပိုပိုထွက်ပြီး ပိုရိုက်တယ် ထင်ပါရဲ့...။ ကျွန်မကတော့ ထုံးစံအတိုင်း အခန်းတံခါးပါ ပိတ်ထားလိုက်ပြီး နားနှစ်ဖက်ကို ဆို့ထားလိုက်တော့ သူတို့ဇာတ်လမ်းက ဘယ်လို ဘယ်လိုတွေ အဆုံးသတ်သွားလဲ မသိပါဘူး..။ နောက်နေ့မနက်ကျတော့ ကပ္ပလီမလေး အိမ်ကနေ ထွက်ပြေးသွားပါတော့တယ်...။ ကျွန်မ အစ်မမှာ အဲဒီလိုဆိုပြန်တော့လည်း တကယ့်ကို သမီးပျောက်သွားတဲ့ မအေကျနေတာပါပဲ။ “သမီးလေးရေ....သမီးလေးရေ.....မေမေကြီးဆီကို ပြန်လာပါတော့...” “မိုးတွေက ရွာတော့မယ် ...သမီးလေးက ဘယ်များရောက်နေပါလိမ့် ....” စသည်ဖြင့် သူရတက်မအေး ဖြစ်နေတာကို ကျွန်မအနေဖြင့် ဘေးကနေကြည့်ပြီး စိတ်မကောင်းသော်ငြားလည်း တဘက်ကနေကြည့်တော့ ပျော်သလိုလိုတော့ ရှိနေပါသည်။ ကျွန်မ အစ်မတို့က သူ့ကို လိုက်ရှာပြီဆိုရင်လည်း ကျွန်မက “နေပါစေ သူ့ဟာသူ နေချင်ရင် ပြန်လာမှာပေါ့ ....ကြောင်ဆိုတာ လက်သာတဲ့ အိမ်မှာပဲနေတာ သစ္စာရှိတာမဟုတ်ဘူး....” ဘာညာနဲ့ တားသလိုလို ပြောမိတတ်ပါသေးတယ်။ ဘာ့ကြောင့်လည်းဆိုတော့ ဒီကပ္ပလီမလေး မရှိမှ ကျွန်မချစ်တဲ့ ကလေးလေးက ပုံမှန်အတိုင်း အိမ်ကို ပြန်လာပြီး ၀င်ထွက်စားသောက် ဆော့ကစားနေရတာ ဆိုတော့လေ....။

ကိုယ့်ကိုကိုယ် သုံးသပ်ကြည့်လိုက်တော့ ကျွန်မထင်ပါတယ်...။ ကျွန်မဟာ ကပ္ပလီမလေးကို စတွေ့တွေ့ချင်းကတည်းက မနှစ်မြို့စရာ ဖြစ်ရပ်နဲ့ ကြုံတွေ့ခဲ့ရတဲ့ အပြင် ကလေးလေးနဲ့ ပတ်သက်ပြီးတော့ပါ သူ့ကို အမြင်မကြည်မလင်ဖြစ်နေတော့ သူအခုလိုထွက်ပြေးသွားတာကို့ ကျွန်မရဲ့ မသိစိတ်ထဲမှာ ၀မ်းသာပြီး ပြန်လာမှာကို စိုးရိမ်နေပုံရပါတယ်။ ကျွန်မပြောချင်တာ အဲဒါပါပဲ...။ တကယ်ဆို ကျွန်မ အသက်အရွယ်နဲ့ ဒီလို စိတ်မျိုးထားသင့်သလား...။ ကိုယ်က အသိဥာဏ်ရှိတဲ့ လူ.... သူက တိရစ္ဆာန်...။ ပြီးတော့ သတ္တ၀ါတိုင်း အပေါ်မှာ မိမိနဲ့တန်းတူ ကိုယ်ချင်းစာ တရား၊ မေတ္တာတရား ထားရှိရမယ်ဆိုတဲ့ ဆုံးမစာမျိုးတွေကလည်း လူမှန်းသိတတ်စကတည်းက မိဘတွေက သင်ပေးထားခဲ့လို့ အရိုးစွဲအောင်တောင် သိနေပြီ ။ သြော်....ဒါပေမယ့် သိပင် သိငြားသော်လည်း ကျွန်မဟာ သူတော်စဉ် သူတော်မြတ် မဟုတ်သေးတဲ့ ပုထုဇဉ် စစ်စစ်ဖြစ်နေတော့လည်း တွေးလိုက်ရင် ကိုယ့်စိတ်သဘောထားမှားနေမှန်း သိသော်လည်း အကယ်ရွေ့များ နောက်တစ်ကြိမ် ကျွန်မအစ်မတို့သာ ကပ္ပလီလေးကို ပြန်ခေါ်လာခဲ့ရင် သူ့အပေါ်မှာ ကလေးလေးလို ချစ်နိုင်ပါ့မလားဆိုရင်တော့ ဟုတ်ကဲ့...ခုချိန်ထိတော့ အဲဒီလို မချစ်နိုင်လောက်ဘူး ဆိုတာ သေချာနေပါသေးတယ်။ ။

(စာကြွင်း။ ။ တစ်ခုမေ့တော့မလို့ ...ကျွန်မ အစ်မကို ဒီပိုစ့်ရေးထားတာကို ပေးသိလို့ မဖြစ်ဘူး...တော်ကြာသူ့ကို လူသိရှင်ကြား မုဆိုးတစ်ပိုင်း မိန်းမရိုင်းကြီးပုံစံနဲ့ ထည့်ရေးထားရပါ့မလားဆိုပြီး အမျက်တော်တွေရှပြီး တော်ကြာ ကျွန်မကို ထမင်းချက်မကျွေးတော့ရင် နေ့တိုင်း ခေါက်ဆွဲပြုတ်နဲ့ချည်း နှစ်ပါးသွားနေရမှာ စိုးလို့လေ ။း)))))

pika21pika15pika24